អង្គការសុខភាពពិភពលោក (WHO) បាននិយាយកាលពីថ្ងៃទីពុធ (០៧ សីហា) ថា ខ្លួននឹងបញ្ជូនវ៉ាក់សាំងជំងឺស្វិតដៃជើងជាងមួយលានដូសទៅកាន់តំបន់ហ្កាហ្សា ដែលហែកហួរដោយសង្រ្គាម បន្ទាប់ពីមេរោគនេះត្រូវបានរកឃើញនៅក្នុងទឹកសំណល់នៅទឹកដីប៉ាឡេស្ទីន។

ប្រធានអង្គការ WHO លោក តេដ្រូស អាដហាណូម ហ្កេប្រេយ៉េស៊ូស (Tedros Adhanom Ghebreyesus) បាននិយាយថា បុគ្គលិកសុខាភិបាលត្រូវការចល័តដោយសេរីនៅក្នុងតំបន់ហ្កាហ្សា ដើម្បីគ្រប់គ្រងវ៉ាក់សាំង ដោយបន្ថែមថា បទឈប់បាញ់ ឬយ៉ាងហោចណាស់ «ភាពស្ងប់ស្ងាត់ពីរបីថ្ងៃ» គឺចាំបាច់ណាស់ដើម្បីការពារកុមារនៅតំបន់ហ្កាហ្សា ជាមួយនឹងការចាក់វ៉ាក់សាំងជាប្រចាំ។ មិនមានករណីជំងឺស្វិតដៃជើងណាមួយត្រូវបានគេរកឃើញនៅឡើយទេ។

កាលពីថ្ងៃទី៣០ ខែកក្កដា ក្រសួងសុខាភិបាលនៅតំបន់ហ្កាហ្សា បានប្រកាសថាទឹកដីប៉ាឡេស្ទីននេះជា «តំបន់រីករាលដាលនៃជំងឺស្វិតដៃជើង» ដោយបន្ទោសថាការវាយលុកយោធាអ៊ីស្រាអែល ជាមូលហេតុនាំឱ្យមានការលេចឡើងនៃមេរោគឡើងវិញ និងការដួលរលំនៃប្រព័ន្ធសុខាភិបាល។

ក្រសួងនិយាយថា មេរោគត្រូវបានរកឃើញនៅក្នុងសំណាកទឹកសំណល់ដែលបានយកនៅក្នុងទីក្រុង ខាន់យូនីស (Khan Younis) នៅភាគខាងត្បូង ក៏ដូចជានៅតំបន់កណ្តាលហ្កាហ្សា។ មេរោគស្វិតដៃជើងនេះគឺឆ្លងខ្លាំងណាស់ ដោយភាគច្រើនជាញឹកញាប់ឆ្លងតាមរយៈទឹកស្អុយ និងទឹកកខ្វក់។ វាអាចបណ្តាលឱ្យអ្នកឆ្លងខូចទ្រង់ទ្រាយរាងកាយ និងខ្វិន ហើយអាចស្លាប់បាន។ ជាចម្បងវាប៉ះពាល់ដល់កុមារអាយុក្រោម ៥ ឆ្នាំ៕