នាយកប្រតិបត្តិក្រុមហ៊ុនរថយន្ត តេស្លា (Tesla) និងជាម្ចាស់ក្រុមហ៊ុនបណ្ដាញសង្គម X លោក អ៊ីឡុន ម៉ាស (Elon Musk) បានបង្ហោះសារមួយកាលពីថ្ងៃអាទិត្យ សប្ដាហ៍មុនថា «សង្រ្គាមស៊ីវិលគឺជៀសមិនរួចទេ» ក្នុងការឆ្លើយតបទៅនឹងការស្តីបន្ទោសដែលថាបាតុកម្មដ៏កក្រើកទូទាំងចក្រភពអង់គ្លេស បណ្ដាលមកពីការជំរុញនៅក្នុងប្រព័ន្ធផ្សព្វផ្សាយសង្គម។

បន្ទាប់មកនៅថ្ងៃចន្ទ អ្នកនាំពាក្យនាយករដ្ឋមន្ត្រីចក្រភពអង់គ្លេស លោក គា ស្តាមើ (Keir Starmer) បានតបទៅលោក Musk ដោយប្រាប់អ្នកយកព័ត៌មានថា «គ្មានហេតុផលដែលរឿងនោះអាចកើតឡើងទេ»។ ប៉ុន្តែ Musk កាលពីថ្ងៃអង្គារ បានបន្តបង្ហោះចំអកលើលោក Starmer វិញ ហើយថែមទាំងបានប្រដូចចក្រភពអង់គ្លេស ទៅនឹងសហភាពសូវៀត ចំពោះការប៉ុនប៉ងរឹតបន្តឹងលើការនិយាយបែបប្រមាថលើប្រព័ន្ធផ្សព្វផ្សាយសង្គម។

ការសម្រេចចិត្តរបស់លោក Musk ក្នុងការពង្រីកវោហាសាស្ត្រប្រឆាំងជនអន្តោប្រវេសន៍ បង្ហាញពីតួនាទីដែលព័ត៌មានមិនពិតផ្សព្វផ្សាយតាមពិភពអ៊ីនធឺណិត កំពុងជំរុញឱ្យមានអំពើហិង្សាក្នុងពិភពពិត ដែលជាបញ្ហានៃការព្រួយបារម្ភកាន់តែខ្លាំងឡើងចំពោះរដ្ឋាភិបាលចក្រភពអង់គ្លេស។

ក្នុងប៉ុន្មានថ្ងៃថ្មីៗនេះ ក្រុមកុបកម្មបានបំផ្លាញអគារសាធារណៈ ដុតរថយន្ត និងគប់ដុំឥដ្ឋដាក់មន្ត្រីនគរបាល។ ភាពតានតឹងទាំងនេះបានផ្ទុះឡើងកាលពីសប្តាហ៍មុន បន្ទាប់ពីក្រុមស្តាំនិយមជ្រុលបានអះអាងនៅលើប្រព័ន្ធផ្សព្វផ្សាយសង្គមថា ជនដែលត្រូវបានចោទប្រកាន់ពីបទចាក់សម្លាប់កុមារបីនាក់ គឺជាអ្នកស្វែងរកសិទ្ធិជ្រកកោនជនជាតិមូស្លីម។

យុទ្ធនាការផ្សព្វផ្សាយព័ត៌មានមិនពិតតាមអ៊ីនធឺណិតនោះបានបង្កឱ្យមានការខឹងសម្បារខ្លាំងដែលសំដៅទៅលើជនអន្តោប្រវេសន៍។ ការអះអាងមិនពិតអំពីការវាយប្រហារនេះបានរីករាលដាលយ៉ាងឆាប់រហ័សតាមអ៊ីនធឺណិត និងបន្តបង្កើនចំនួនអ្នកមើល សូម្បីតែបន្ទាប់ពីនគរបាលបានបកស្រាយការពិតរួចហើយក៏ដោយ៕