ប្រធានាធិបតីរុស្ស៊ី លោក វ្ល៉ាឌីមៀ ពូទីន និយាយថា ទីក្រុងគីវ បានប៉ុនប៉ង «បង្កហេតុដ៏ធំ» មួយផ្សេងទៀត ដោយការវាយលុកនៅព្រំដែន ចូលទៅក្នុងប្រទេសរុស្ស៊ីភាគខាងលិច។ ក្រសួងការពារជាតិរុស្ស៊ី បានប្រកាសកាលពីថ្ងៃអង្គារថា កងកម្លាំងអ៊ុយក្រែន បានឆ្លងចូល និងវាយប្រហារតំបន់ Kursk ភាគខាងលិចប្រទេសរុស្ស៊ី។

ប្រព័ន្ធផ្សព្វផ្សាយរុស្ស៊ី បានដកស្រង់សម្តីអាជ្ញាធរដែលនិយាយថា ជនស៊ីវិល៥នាក់បានស្លាប់ និង២៤នាក់ផ្សេងទៀតរងរបួស។

 លោកពូទីន បានថ្កោលទោសអ៊ុយក្រែន នៅក្នុងកិច្ចប្រជុំជាមួយសមាជិករដ្ឋាភិបាល កាលពីថ្ងៃពុធ ហើយបានណែនាំភ្នាក់ងារ ឱ្យផ្តល់ជំនួយដល់ប្រជាជននៅក្នុងតំបន់នោះ។

ក្រោយមក លោកបានបើកកិច្ចប្រជុំដាច់ដោយឡែកមួយផ្សេងទៀត ជាមួយមន្ត្រីការពារជាតិ និងសន្តិសុខជាន់ខ្ពស់ រួមមានទាំងរដ្ឋមន្ត្រីការពារជាតិ លោក Andrei Belousov និងនាយកទីភ្នាក់ងារសេវាសន្តិសុខសហព័ន្ធ លោក Alexander Bortnikov ។

នាយសេនាធិការនៃកងកម្លាំងប្រដាប់អាវុធរុស្ស៊ី លោក Valery Gerasimov បាននិយាយនៅក្នុងកិច្ចប្រជុំថា ទាហានអ៊ុយក្រែនប្រហែល១.០០០នាក់ បានបើកការវាយប្រហារក្នុងគោលបំណងដណ្តើមកាន់កាប់ផ្នែកនៅទីក្រុង Kursk។

លោក Gerasimov និយាយបន្តថា កងកម្លាំងរុស្ស៊ី បានរារាំងទាហានអ៊ុយក្រែន មិនឱ្យរុលទៅមុខ ប៉ុន្តែនៅតែប្រយុទ្ធដើម្បីវាយរុញច្រានពួកគេ ឲ្យត្រឡប់វិញ។

យោធាអ៊ុយក្រែន ពុំបានចេញសេចក្តីអធិប្បាយអំពីការវាយប្រហារនេះទេ។