ភ្នំពេញ ៖ ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នឹងអញ្ជើញចូលរួមកិច្ចប្រជុំរដ្ឋមន្ត្រីការបរទេសអាស៊ាន ជាមួយចក្រភពអង់គ្លេស ស្ដីពីជំងឺកូវីដ–១៩ ដែលនឹងប្រព្រឹត្តទៅនៅថ្ងៃទី៣០ ខែកញ្ញា ឆ្នាំ២០២០ តាមប្រព័ន្ធវីដេអូ។
យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ដែលបានចេញ នៅព្រឹកថ្ងៃទី២៩ ខែកញ្ញានេះ បានឲ្យដឹងថា ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា នឹងអញ្ជើញចូលរួមកិច្ចប្រជុំរដ្ឋមន្ត្រីការបរទេសអាស៊ាន ជាមួយចក្រភពអង់គ្លេស ស្ដីពីជំងឺកូវីដ–១៩ ដែលនឹងប្រព្រឹត្តទៅនៅថ្ងៃទី៣០ ខែកញ្ញា ឆ្នាំ២០២០ តាមរយៈប្រព័ន្ធវីដេអូ។
សេចក្តីប្រកាស បានបន្តថា នៅក្នុងកិច្ចប្រជុំនោះ រដ្ឋមន្ត្រីការបរទេសអាស៊ាន និងអង់គ្លេស នឹងផ្លាស់ប្តូរយោបល់គ្នាអំពីបទពិសោធន៍ និងឧត្តម្មានុវត្តន៍ ក្នុងការឆ្លើយតបនឹងការរាតត្បាតជំងឺកូវីដ–១៩ ក៏ដូចជា ផែនការស្តារសេដ្ឋកិច្ចឡើងវិញក្រោយពីវិបត្តិជំងឺនេះ។
ក្នុងឱកាសនេះដែរ រដ្ឋមន្ត្រីការបរទេសទាំងអស់ ក៏នឹងពិភាក្សាអំពីវិធីសាស្ត្រនានាដើម្បីលើកកម្ពស់ទំនាក់ទំនង និងកិច្ចសហប្រតិបត្តិការលើគ្រប់វិស័យដែលមានផលប្រយោជន៍រួមគ្នារវាងអង់គ្លេស និងប្រទេសសមាជិកអាស៊ាន។ បញ្ហាតំបន់ និងសកល ដែលជាកង្វល់រួម ក៏ជារបៀបវារៈនៃកិច្ចពិភាក្សាគ្នាផងដែរ។
សេចក្តីប្រកាសព័ត៌មានដដែល បានបញ្ជាក់ទៀតថា កិច្ចប្រជុំតាមប្រព័ន្ធវីដេអូនេះ នឹងក្លាយជាជំហានមួយឆ្ពោះទៅរកការរៀបចំទិសដៅអនាគតសម្រាប់ជំរុញទំនាក់ទំនង និងកិច្ចសហប្រតិបត្តិការអាស៊ាន-អង់គ្លេស ក្នុងបរិបទនៃបញ្ហាប្រឈមជាសកលនៃជំងឺឆ្លងកូវីដ–១៩ ដែលពុំធ្លាប់មានពីមុន និងការចាកចេញរបស់អង់គ្លេសពីសហភាពអឺរ៉ុប៕
អត្ថបទ ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
