អ្នកនាំពាក្យក្រសួងការបរទេសរុស្ស៊ី អ្នកស្រី Maria Zakharova បានប្រាប់វិទ្យុ Sputnik ថា ការវាយប្រហាររបស់អ៊ុយក្រែនកាលពីថ្ងៃអង្គារ ទៅលើខ្សែបន្ទាត់ព្រំដែននៃតំបន់ Kursk របស់រុស្ស៊ី គឺជាការវាយប្រហារភេរវកម្មមួយទៀតប្រឆាំងនឹងជនស៊ីវិល។

អ្នកការទូតរូបនេះ បានថ្លែងថា៖«នោះជាការវាយប្រហារភេរវកម្មមួយផ្សេងទៀតដែលជាក់ស្តែង បានកំណត់គោលដៅទៅលើអ្នកស្រុក និងជនស៊ីវិលស្លូតត្រង់។

ប្រធានពេទ្យជំនាញផ្នែកវះកាត់ប្រចាំតំបន់នេះ លោក Andrey Loktionov បានប្រាប់អ្នកយកព័ត៌មានថា ទន្ទឹមនឹងនេះដែរ ចំនួនអ្នករងរបួសនៅក្នុងការវាយប្រហារដ៏ធំរបស់អ៊ុយក្រែន បានកើនឡើងដល់ ២៨ នាក់ហើយ។  

កាលពីថ្ងៃទី ៦ ខែសីហា តំបន់ Kursk បានស្ថិតនៅក្រោមការវាយប្រហារដ៏ធំរបស់អ៊ុយក្រែន។ ប្រព័ន្ធការពារដែនអាកាសរុស្ស៊ី បានបាញ់យានដ្រូនចំនួន ២៦គ្រឿង និងគ្រាប់រ៉ុក្កែតជាច្រើននៅលើដែនអាកាស នៃតំបន់នេះ ខណៈដែលការប៉ុនប៉ងរបស់អ៊ុយក្រែន ដើម្បីទម្លាយព្រំដែនរដ្ឋ ត្រូវបានរារាំង។ មនុស្ស ៥ នាក់ បានស្លាប់ ក្នុងការវាយប្រហារនោះ។