ទីភ្នាក់ងារសារព័ត៌មានអារ៉ាប៊ីសាអ៊ូឌីត បានរាយការណ៍ថា អនុរដ្ឋមន្ត្រីការបរទេសអារ៉ាប៊ីសាអ៊ូឌីត លោក វ៉ាលីដ អាល់ឃួរ៉ាជី (Walid al-Khuraiji) បាននិយាយកាលពីថ្ងៃពុធថា ការធ្វើឃាតមេដឹកនាំក្រុមហាម៉ាស លោក អ៊ីស្មេល ហានីយេ ( Ismail Haniyeh) នៅទីក្រុងតេអេរ៉ង់ គឺជាការរំលោភលើអធិបតេយ្យភាពរបស់ប្រទេសអ៊ីរ៉ង់ និងច្បាប់អន្តរជាតិ។

លោក អាល់ឃួរ៉ាជី បានធ្វើការអត្ថាធិប្បាយទាំងនេះ ក្នុងអំឡុងពេលកិច្ចប្រជុំនៃអង្គការសហប្រតិបត្តិការ   ឥ ស្លាម (OIC) នៅទីក្រុង Jeddah ។ លោកបញ្ជាក់ថា ការធ្វើឃាតនេះ បានបង្កការគំរាមកំហែងដល់ស្ថិរភាព និងសន្តិភាពក្នុងតំបន់។

លោកក៏ បានថ្កោលទោសអ៊ីស្រាអែលជុំវិញការបង្កើនអំពើហិង្សាលើជនស៊ីវិលប៉ាឡេស្ទីន ដោយអំពាវនាវដល់សហគមន៍អន្តរជាតិ ឲ្យកងកម្លាំងអ៊ីស្រាអែលទទួលខុសត្រូវចំពោះសកម្មភាពរបស់ពួកគេ។

លោក ហានីយេ ដែលត្រូវបានអញ្ជើញឲ្យចូលរួមក្នុងពិធីស្បថចូលកាន់តំណែងរបស់ប្រធានាធិបតីអ៊ីរ៉ង់ លោក Masoud Pezeshkian ត្រូវបានសម្លាប់រួមជាមួយអង្គរក្សរបស់គាត់ កាលពីថ្ងៃទី ៣១ ខែកក្កដា នៅពេលដែលគេហដ្ឋានរបស់ពួកគេក្នុងទីក្រុងតេអេរ៉ង់ ត្រូវបានវាយប្រហារ ដែលអ៊ីរ៉ង់បានប្តេជ្ញាធ្វើការឆ្លើយតបដ៏ឃោរឃៅ និងគួរឲ្យឈឺចាប់បំផុត។