ឧត្តមសេនីយ៍ Apty Alaudinov អនុប្រធាននាយកដ្ឋានយោធា និងនយោបាយរបស់កងកម្លាំងប្រដាប់អាវុធរុស្ស៊ី និងជាមេបញ្ជាការនៃអង្គភាពកងកម្លាំងពិសេស Akhmat បាននិយាយថា អ៊ុយក្រែន នឹងមិនអាចដណ្តើមយករោងចក្រថាមពលនុយក្លេអ៊ែរ Kursk បានទេ ហើយការវាយប្រហាររបស់ខ្លួន ទៅលើរោងចក្រនេះ នឹងត្រូវបរាជ័យ។ 

លោកបាននិយាយនៅក្នុងបទសម្ភាសន៍ជាមួយទូរទស្សន៍ Soloviev Liveថា៖«យើងឃើញថា ជួរមុខ កំពុងដួលរលំ។ អ៊ុយក្រែន យល់ថា ខ្លួនមិនអាចធ្វើអ្វី ដើម្បីបញ្ឈប់បញ្ហានេះបានទេ។ ដូច្នេះ ពួកគេកំពុងព្យាយាមដណើ្តមយកអ្វីមួយ ដើម្បីបង្ហាញអ្នកឧបត្ថម្ភរបស់ពួកគេថា ពួកគេ នៅតែមានសមត្ថភាព និងកែលម្អជំហរចរចារបស់ពួកគេ។ ជាក់ស្តែង ពួកគេមិនមានធនធានគ្រប់គ្រាន់ ដើម្បីវាយដណ្តើមយក រោងចក្រនុយក្លេអ៊ែរនោះទេ ទោះបីជាពួកគេចង់ បានវាយ៉ាងណាក៏ដោយ»។ 

លោកបានបន្ថែមថា៖«ទាហានទាំងនោះដែលបានបញ្ចេញនូវអ្វីដែលហៅថា ជាការវាយបកនោះ ពួកគេដឹងយ៉ាងច្បាស់ថា ពួកគេគ្មានឱកាស ដើម្បីសម្រេចបាននូវអ្វីមួយធំដុំនោះទេ»។