យោងតាមទីភ្នាក់ងារសារព័ត៌មានផ្លូវការរបស់អ៊ីរ៉ង់ IRNA បានរាយការណ៍ថា ប្រទេសអ៊ីរ៉ង់ និងបេឡារុស កាលពីថ្ងៃពុធបានបញ្ជាក់ពីសារៈសំខាន់នៃកិច្ចសហប្រតិបត្តិការដើម្បីទប់ទល់ចំពោះឯកតោភាគីនិយមរបស់សហរដ្ឋអាមេរិក។ 

របាយការណ៍បាននិយាយថា នៅក្នុងកិច្ចប្រជុំមួយនៅក្នុងរដ្ឋធានីតេអេរ៉ង់ ប្រទេសអ៊ីរ៉ង់ មេបញ្ជាការកងទ័ពអ៊ីរ៉ង់ លោក Abdolrahim Mousavi និងមេបញ្ជាការកងទ័ពអាកាសនិងការពារដែនអាកាសបេឡារុស លោក Andrey Lukyanovich បានសម្តែងនូវឆន្ទៈរបស់ប្រទេសទាំងពីរ ក្នុងការពង្រីកកិច្ចសហប្រតិបត្តិការទ្វេភាគី ជាពិសេសក្នុងវិស័យការពារជាតិ។

លោក Mousavi បាននិយាយថា អ៊ីរ៉ង់ និងបេឡារុស ត្រូវប្រឈមមុខទៅនឹងការគំរាមកំហែងរួម និងមានផលប្រយោជន៍រួមគ្នា ហើយទោះបីជាប្រទេសទាំងពីរស្ថិតនៅក្រោមការដាក់ទណ្ឌកម្ម «ដ៏ឃោរឃៅ» ពីសំណាក់សហរដ្ឋអាមេរិក និងលោកខាងលិចក៏ដោយ ប៉ុន្តែប្រទេសទាំងពីរនៅតែឯករាជ្យ។ លោក បាននិយាយថា ប្រទេសបេឡារុស មានទីតាំងយុទ្ធសាស្ត្រពិសេស និងជារបាំងដ៏រឹងមាំចំពោះការពង្រីកខ្លួនរបស់អង្គការសន្ធិសញ្ញាអាត្លង់ទិកខាងជើង (NATO) ដោយសង្កត់ធ្ងន់លើការប្រឆាំងចំពោះការពង្រីកខ្លួនរបស់អង្គការនេះ។

ចំណែកមេបញ្ជាការប្រទេសបេឡារុស បាននិយាយថា ប្រទេសបេឡារុស បានព្យាយាមពង្រីក និងធ្វើឱ្យទំនាក់ទំនងយោធាកាន់តែស៊ីជម្រៅជាមួយប្រទេសអ៊ីរ៉ង់ ហើយប្រើប្រាស់បទពិសោធន៍ដ៏មានតម្លៃរបស់ប្រទេស ដោយបង្ហាញពីការប្រឆាំងរបស់ប្រទេសលោកចំពោះឯកតោភាគីនិយមរបស់សហរដ្ឋអាមេរិក និងការពង្រីកខ្លួនរបស់សម្ព័ន្ធយោធាណាតូ។