ស្នងការនគរបាលដែលទើបតែងតាំងថ្មីរបស់ប្រទេសបង់ក្លាដែស កាលពីថ្ងៃពុធ (ទី៧ ខែសីហា) បានសុំអភ័យទោស ចំពោះការប្រព្រឹត្តរបស់មន្ត្រី ក្នុងអំឡុងពេលមានការតវ៉ាដែលបណ្ដាលឲ្យមានអ្នកបាត់បង់ជីវិត ហើយបានប្តេជ្ញាថា នឹងមានការស៊ើបអង្កេត «ដោយមិនលំអៀង» លើការសម្លាប់នេះ។

អគ្គស្នងការនគរបាល លោក Md Mainul Islam បានប្រាប់អ្នលកសារព័ត៌មានថា៖ «យើងប្តេជ្ញាធ្វើការស៊ើបអង្កេតដោយយុត្តិធម៌ និងមិនលំអៀងលើរាល់ការសម្លាប់និស្សិត ប្រជាជនសាមញ្ញ និងនគរបាល នាពេលថ្មីៗនេះ»។

ដោយមានរយៈពេលមួយថ្ងៃបន្ទាប់ពីរូបលោកត្រូវបានតែងតាំង បន្ទាប់ពីការធ្លាក់ពីអំណាចរបស់នាយករដ្ឋមន្ត្រី លោក Islam បានប្រាប់ទៀតថា៖ «នៅក្នុងការតវ៉ានេះ មន្ត្រីទទួលខុសត្រូវពីមុនរបស់យើង មិនអាចបំពេញភារកិច្ចរបស់ខ្លួនបាននោះឡើយ តាមការរំពឹងទុករបស់ជនរួមជាតិ។ ក្នុងនាមជាស្នងការនគរបាល ខ្ញុំសូមសុំអភ័យទោស តាងនាមឲ្យនគរបាលបង់ក្លាដែស ចំពោះរឿងនោះ»។

ជាមួយគ្នានេះ លោកក៏បាននិយាយផងដែរថា លោកបានស្នើសុំឲ្យអង្គភាពនគរបាលបញ្ចប់កូដកម្មរបស់ពួកគេ ហើយត្រឡប់ទៅបំពេញកាតព្វកិច្ចវិញ នៅថ្ងៃទី៨ ខែសីហា នៅពេលដែលអ្នកត្រួសត្រាយផ្នែកមីក្រូហិរញ្ញវត្ថុដែលឈ្នះរង្វាន់ណូបែល គឺលោក Muhammad Yunus គ្រោងនឹងត្រឡប់ចូលប្រទេសវិញ ដើម្បីដឹកនាំរដ្ឋាភិបាលចាំផ្ទះ។

គួរបញ្ជាក់ថា មនុស្សជាង ៤០០នាក់ បានបាត់បង់ជីវិត ក្នុងអំឡុងពេលជាច្រើនសប្តាហ៍នៃការប៉ះទង្គិចគ្នារវាងក្រុមបាតុករ និងកងកម្លាំងសន្តិសុខ មុនពេលអតីតនាយករដ្ឋមន្ត្រី លោកស្រី Sheikh Hasina លាលែងពីតំណែងនៅថ្ងៃទី៥ ខែសីហា៕