ប្រធានសហជីពកម្មករ United Auto Workers (UAW) គឺលោក Shawn Fain កាលពីថ្ងៃពុធ (ទី៧ ខែសីហា) បានរិះគន់ទំនាក់ទំនងរបស់បេក្ខជនប្រធានាធិបតីនៃគណបក្សសាធារណរដ្ឋ គឺលោក Donald Trump ជាមួយនឹងមហាសេដ្ឋី លោក Elon Musk ខណៈពេលដែលរូបលោកកំពុងធ្វើយុទ្ធនាការសម្រាប់អនុប្រធានាធិបតី គឺលោកស្រី Kamala Harris ដែលជាបេក្ខជនរបស់គណបក្សប្រជាធិបតេយ្យ។

លោក Musk បានគាំទ្រ Trump សម្រាប់ការបោះឆ្នោតនៅខែវិច្ឆិកា បន្ទាប់ពីអតីតប្រធានាធិបតី បានរួចជីវិតពីការប៉ុនប៉ងធ្វើឃាត កាលពីខែកក្កដា។ ក្រោយមក នៅខែនោះ សារព័ត៌មាន Wall Street Journal បានរាយការណ៍ថា លោក Musk គ្រោងនឹងផ្តល់ប្រាក់ប្រហែល ៤៥លានដុល្លារ ក្នុងមួយខែ ដល់គណៈកម្មាធិការសកម្មភាពនយោបាយថ្មីដែលគាំទ្រលោក Trump។ 

តែយ៉ាងណាក្ដី បន្ទាប់ពីការចេញផ្សាយរបាយការណ៍នោះ ទាំងលោក Musk និងលោក Trump បាននិយាយថា នាយកប្រតិបត្តិរបស់ក្រុមហ៊ុន Tesla មិនដែលសន្យាផ្តល់អំណោយបែបនេះនោះឡើយ។

ខណៈដែលកំពុងធ្វើយុទ្ធនាការសម្រាប់លោកស្រី Harris លោក Fain បាននិយាយកាលពីថ្ងៃពុធថា៖ «អស់ជាច្រើនខែមកហើយ ដែលលោក Donald Trump បានដើរបំផ្លាញរដ្ឋរបស់យើង ឧស្សាហកម្មរបស់យើង និងកម្មករយានយន្តអាមេរិក ដោយនិយាយថា លោកប្រឆាំងនឹងរថយន្តអគ្គិសនី។ ហើយបន្ទាប់មកមានអ្វីមួយបានកើតឡើង។ យើងបានឃើញលោក Elon Musk ប្រកាសថា លោកនឹងផ្តល់ឲ្យ Donald Trump ៤៥លានដុល្លារ ក្នុងមួយខែ»។ 

សហជីព UAW បានគាំទ្រលោកស្រី Harris ដែលបានក្លាយជាបេក្ខជនប្រធានាធិបតីនៃគណបក្សប្រជាធិបតេយ្យ នាពេលថ្មីៗនេះ បន្ទាប់ពីលោក Joe Biden បានប្រកាសដកខ្លួនពីការតែងតាំងបេក្ខជនទី១ របស់គណបក្ស៕