ភ្នំពេញ៖ សាកលវិទ្យាល័យអាមេរិកកាំងភ្នំពេញ (AUPP) បានសហការជាមួយសាកលវិទ្យាល័យ Arizona (UA), សាកលវិទ្យាល័យ (FHSU), សាកលវិទ្យាល័យ Malaysia Sarawak (UNIMAS) និង Primax Foundation (India) រៀបចំសន្និសីទថ្នាក់អន្តរជាតិមួយស្តីអំពី ការធ្វើសមាហរណកម្មក្នុងអាជីវកម្ម បច្ចេកវិទ្យាឌីជីថល និងវិទ្យាសាស្ត្រសង្គមសម្រាប់ការអភិវឌ្ឍន៍ដែលប្រកបដោយនិរន្តរភាពក្នុងតំបន់អាស៊ាន និងតំបន់ផ្សេងៗទៀត នៅរាជធានីភ្នំពេញ។

សន្និសីទថ្នាក់អន្តរជាតិនេះ ត្រូវបានរៀបចំឡើងដើម្បីសម្របសម្រួលដល់ការពិភាក្សា និងការស្រាវជ្រាវរបស់សាស្ត្រាចារ្យ អ្នកជំនាញ និងបញ្ញាវន្តអំពីទំនាក់ទំនងរវាងអាជីវកម្ម បច្ចេកវិទ្យាឌីជីថល និងវិទ្យាសាស្ត្រសង្គមសម្រាប់ការអភិវឌ្ឍប្រកបដោយចីរភាពនៅក្នុងតំបន់អាស៊ាន និងតំបន់ផ្សេងៗទៀត។

លោកស្រីសាស្ត្រាចារ្យ យ៉ាម៉ូណា ស៊ីថាមបាឡាំ សាកលវិទ្យាធិការងកិច្ចការសិក្សា និងនិស្សិត នៃសាកលវិទ្យាល័យអាមេរិកកាំងភ្នំពេញ នៅក្រោយសន្និសីទនេះ បានមានប្រសាសន៍ប្រាប់ក្រុមអ្នកសារព័ត៌មាន ឲ្យដឹងថា សន្និសីទថ្នាក់ជាតិនេះ គឺជាលើកទី១ ដែលសាកលវិទ្យាល័យអាមេរិកកាំងភ្នំពេញរៀបចំឡើង ដោយមានអ្នកចូលរួមចំនួនជាង១០០នាក់ មកពីប៉ែកអឺរ៉ុប អាម៉េរិក នេប៉ាល់ និងប្រទេសផ្សេងៗទៀត។

លោកស្រី បានបន្តថា គោលបំណងនៃសន្និសីទថ្នាក់អន្តរជាតិនេះ ដើម្បីវិភាគ និងជជែកវែកញែកអំពីផលប៉ះពាល់ជាវិជ្ជមាននៃការធ្វើសមាហរណកម្មអាជីវកម្ម បច្ចេកវិទ្យាឌីជីថល និងវិទ្យាសាស្ត្រសង្គមសម្រាប់ការអភិវឌ្ឍប្រកបដោយចីរភាពនៅក្នុងតំបន់អាស៊ាន និងតំបន់ផ្សេងៗទៀត , កំណត់ និងរកឱ្យឃើញអំពីបទពិសោធន៍នៃការអនុវត្តន៍ល្អ និងករណីសិក្សាដែលបង្ហាញពីយុទ្ធសាស្ត្រធ្វើសមាហរណកម្មជោគជ័យអាជីវកម្ម បច្ចេកវិទ្យាឌីជីថល និងវិទ្យាសាស្ត្រសង្គម , ស្វែងយល់ពីតួនាទីនៃក្របខណ្ឌគោលនយោបាយ បទប្បញ្ញត្តិ និងយន្តការអភិបាលកិច្ចនានាក្នុងការជំរុញការធ្វើសមាហរណកម្មនៃវិស័យទាំងនេះសម្រាប់ការអភិវឌ្ឍន៍ប្រកបដោយចីរភាព , ពិភាក្សាអំពីនិន្នាការនានា ការប្រឈម និងឱកាសដែលកំពុងកើតមាននៅក្នុងការធ្វើសមាហរណកម្មក្នុងអាជីវកម្ម បច្ចេកវិទ្យាឌីជីថល និងវិទ្យាសាស្ត្រសង្គមសម្រាប់ការអភិវឌ្ឍន៍ប្រកបដោយចីរភាព និងសម្របសម្រួលក្នុងការពិភាក្សា និងកិច្ចសហការលើដំណោះស្រាយដែលប្រកបដោយភាពច្នៃប្រឌិតខ្ពស់ គម្រោងស្រាវជ្រាវ និងគំនិតផ្តួចផ្តើមដែលលើកកម្ពស់និរន្តរភាព និងដំណោះស្រាយតម្រូវការសង្គមនៅក្នុងតំបន់អាស៊ាន និងតំបន់ផ្សេងៗទៀត។

សូមជម្រាបជូនថា សន្និសីទថ្នាក់អន្តរជាតិ IBTSS 2024 បានប្រព្រឹត្តទៅក្រោមវត្តមានរបស់ លោកជំទាវបណ្ឌិត បូ ច័ន្ទគូលិកា អនុរដ្ឋលេខាធិការក្រសួងអប់រំ យុវជន និងកីឡា , លោកបណ្ឌិត ម៉ាលខម ម៉ាក់ខៃវើរ សាកលវិទ្យាធិការ នៃសាកលវិទ្យាល័យអាមេរិកកាំងភ្នំពេញ , ឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួលបន្ទុកជានាយកប្រតិបត្ដិនៃសហគ្រិនខ្មែរ និងឯកឧត្តម កែវ សុទ្ធិ រដ្ឋលេខាធិការក្រសួងប្រៃសណីយ៍ និងទូរគមនាគមន៍។ សន្និសីទនេះដែរ នឹងផ្តោតសំខាន់លើប្រធានបទធំៗចំនួន៣ រួមមានដូចជា៖ ១.បច្ចេកវិទ្យាឌីជីថល ២.អាជីវកម្ម និងសេដ្ឋកិច្ច និង៣.វិទ្យាសាស្ត្រសង្គម៕