អភិបាលក្រុង Nagasaki នៅថ្ងៃព្រហស្បតិ៍ (ទី៨ ខែសីហា) នេះ បាននិយាយថា វាជារឿងគួរឲ្យសោកស្ដាយដែលឯកអគ្គរដ្ឋទូតអាមេរិក និងអង់គ្លេស បានបដិសេធមិនចូលរួមក្នុងពិធី ដែលធ្វើឡើងដើម្បីប្រារព្ធខួបនៃការទម្លាក់គ្រាប់បែកបរមាណូ នៅឆ្នាំ១៩៤៥ លើទីក្រុងរបស់ប្រទេសជប៉ុនមួយនេះ ដោយការបដិសេធនោះកើតមានឡើងដោយសារតែអ៊ីស្រាអែលមិនត្រូវបានអញ្ជើញ។

ប៉ុន្តែលោកអភិបាលក្រុងបាននិយាយការពារចំពោះការសម្រេចចិត្តមិនអញ្ជើញអ៊ីស្រាអែលឲ្យចូលរួមព្រឹត្តិការណ៍ប្រចាំឆ្នាំ នាថ្ងៃទី៩ សីហានេះ ដោយលើកឡើងជាថ្មីម្ដងទៀតថា ការធ្វើបែបនេះមិនមែនជារឿងនយោបាយនោះទេ ប៉ុន្តែគ្រាន់តែចង់បញ្ចៀសការតវ៉ាដែលអាចកើតមាន ទាក់ទងនឹងជម្លោះនៅតំបន់ហ្កាហ្សាប៉ុណ្ណោះ។

លោក Shiro Suzuki បានប្រាប់អ្នកសារព័ត៌មានថា៖ «គឺជារឿងគួរឲ្យសោកស្ដាយណាស់ ដែលពួកគេបានទាក់ទងមកប្រាប់យើងថា ឯកអគ្គរដ្ឋទូត (សហរដ្ឋអាមេរិក និងអង់គ្លេស) របស់ពួកគេ មិនអាចចូលរួមក្នុងពិធីរំលឹកខួបនេះបានឡើយ។ យើងសូមជម្រាបថា ពាក់ព័ន្ធនឹងអ៊ីស្រាអែល យើងបានធ្វើការសម្រេចគ្រប់ជ្រុងជ្រោយ ពោលគឺមិនមែនដោយហេតុផលនយោបាយនោះទេ។ យើងចង់ឲ្យពិធីប្រព្រឹត្តទៅដោយរលូន ក្នុងបរិយាកាសសន្តិភាព និងឱឡារិក»។

សូមរំលឹកថា នៅថ្ងៃទី៩ ខែសីហា ឆ្នាំ១៩៤៥ សហរដ្ឋអាមេរិកបានទម្លាក់គ្រាប់បែកបរមាណូលើទីក្រុង Nagasaki ដោយបានសម្លាប់មនុស្សចំនួន ៧៤.០០០នាក់ ក្នុងនោះរួមមានទាំងមនុស្សជាច្រើនដែលបានរួចរស់ជីវិតពីហេតុការណ៍នោះ ប៉ុន្តែក្រោយមកបានស្លាប់ដោយសារការប៉ះពាល់ពីការសាយភាយវិទ្យុសកម្ម។

ការទម្លាក់នេះបានកើតឡើង ៣ថ្ងៃបន្ទាប់ពីការទម្លាក់គ្រាប់បែកនុយក្លេអ៊ែរលើកទី១ លើទីក្រុងហ៊ីរ៉ូស៊ីម៉ា ដែលបានសម្លាប់មនុស្ស ១៤.០០០នាក់។ ជប៉ុនបានប្រកាសចុះចាញ់ក្នុងសង្គ្រាមលោកលើកទី២ នៅថ្ងៃទី១៥ ខែសីហា ឆ្នាំ១៩៤៥៕