​​អា​ហ្វ​ហ្គា​នី​ស្ថាន៖ ក្រុម​តា​លី​បង់​បាន​តែង​តាំង​លោក Mohammad Hasan Akhund ដែល​ជា​មនុស្ស​ជិតស្និទ្ធ​របស់​ស្ថាបនិក​ចលនា​នេះ​គឺលោក Mullah Omar ជា​ប្រមុខ​រដ្ឋាភិបាល​ចាំ​ផ្ទះ​ថ្មី​របស់​អា​ហ្វ​ហ្គា​នី​ស្ថាន ប៉ុន្មាន​សប្តាហ៍​បន្ទាប់ពី​បាន​គ្រប់គ្រង​ប្រទេស​នៅ​ក្នុង​ការ​វាយ​លុក​យ៉ាង​ឆាប់រហ័ស​។​

​តារាង​ឈ្មោះ​សមាជិក​គណៈរដ្ឋមន្ត្រី​ដែល​បានប្រកាស​ដោយ​ប្រធាន​អ្នកនាំពាក្យ​លោក Zabihullah Mujahid កាលពី​ថ្ងៃ​អង្គារ​ភាគច្រើន​ជា​សមាជិក​ឆ្មាំ​ចាស់ៗ​របស់​ក្រុម​នេះ ដោយ​មិនមាន​ស្ត្រី​ណា​ម្នាក់​ត្រូវបាន​រាប់បញ្ចូល​នោះទេ​។ ​លោក Abdul Ghani Baradar ​ប្រធានការិយាល័យ​នយោបាយ​របស់​ក្រុមតា​លី​បង់​នឹង​ក្លាយជា​ឧបនាយករដ្ឋមន្ត្រី ខណៈ​លោក Sirajuddin Haqqani កូនប្រុស​របស់​ស្ថាបនិក Haqqani Network ត្រូវបានតែងតាំង​ជា​រដ្ឋមន្ត្រី​ក្រសួងមហាផ្ទៃ​។

​លោក Mullah Mohammad Yaqoob ត្រូវបានតែងតាំង​ជា​រដ្ឋមន្ត្រី​ការពារជាតិ។ លោក Hedayatullah Badri នឹង​កាន់តំណែង​ជា​រដ្ឋមន្ត្រី​ស្ដីទី​នៃ​ក្រសួង​ហិរញ្ញវត្ថុ ខណៈ​លោក Amir Khan Muttaqi ​ដែលជា​អ្នក​ចរ​ចា​តំណាង​ឲ្យ​ក្រុម​តា​លី​បង់នៅក្នុង​ទីក្រុង​ដូ​ហា (Doha) ត្រូវបានតែងតាំង​ជា​រដ្ឋមន្ត្រីការបរទេស​។ ​លោកនាយក​រដ្ឋមន្ត្រី​ស្តីទី Akhund ស្ថិតនៅក្នុង​បញ្ជី​ឈ្មោះ​ដាក់ទណ្ឌកម្ម​របស់​អង្គការសហប្រជាជាតិ ចំណែក​រដ្ឋមន្ត្រីក្រសួង​មហាផ្ទៃ​ស្ថិតក្នុង​បញ្ជី​ទណ្ឌកម្ម​របស់​សហរដ្ឋ​អាមេរិក​៕

អត្ថបទ៖ សុខមាន