ទីភ្នាក់ងារសារព័ត៌មានវៀតណាម បានរាយការណ៍នៅថ្ងៃព្រហស្បតិ៍នេះថា មនុស្សចំនួន៩នាក់ បានស្លាប់ និង៧នាក់ផ្សេងទៀត បានរងរបួសនៅក្នុងបំណាក់ដី និងទឹកជំនន់ បង្កឡើងដោយភ្លៀងធ្លាក់ខ្លាំង នៅតំបន់ភ្នំ ភាគខាងជើងប្រទេសវៀតណាម ក្នុងខែសីហានេះ។

របាយការណ៍បាននិយាយថា លំនៅឋានចំនួន១២១ខ្នង បានរងការបំផ្លាញក្នុងអំឡុងពេលចាប់ពីថ្ងៃទី ១ ដល់ថ្ងៃទី ៨ ខែសីហា ខណៈលំនៅឋានចំនួន ១០ ខ្នង ត្រូវបានរុះរើបន្ទាន់។

របាយការណ៍បាននិយាយថា ទីតាំងប្រហែល១៧០កន្លែងនៅក្នុងតំបន់ ត្រូវបានស្រុត បណ្តាលឱ្យមានការកកស្ទះចរាចរណ៍។ 

ភ្លៀងធ្លាក់ខ្លាំង ត្រូវបានគេព្យាករណ៍ថានឹងបន្តរហូតដល់ថ្ងៃទី ១៧ខែសីហា នៅតំបន់ភាគខាងជើង នេះបើយោងតាមមជ្ឈមណ្ឌលជាតិសម្រាប់ការព្យាករណ៍ឧត្តុនិយម។

គណៈកម្មាធិការអចិន្ត្រៃយ៍ជាតិទទួលបន្ទុកបង្ការនិងគ្រប់គ្រងគ្រោះមហន្តរាយធម្មជាតិ បាននិយាយថា គ្រោះមហន្តរាយធម្មជាតិនៅក្នុងប្រទេសអាស៊ីអាគ្នេយ៍មួយនេះ បានបណ្តាលឱ្យមនុស្សចំនួន១១១ នាក់ស្លាប់និងបាត់ខ្លួន ចាប់តាំងពីដើមឆ្នាំនេះ រហូតដល់ថ្ងៃទី៥ ខែសីហា ជាចំនួនខ្ពស់បំផុតដែលត្រូវបានរាយការណ៍សម្រាប់រយៈពេលដូចគ្នា ក្នុងរយៈពេលប្រាំឆ្នាំកន្លងទៅនេះ។