នាយករដ្ឋមន្ត្រីអង់គ្លេស លោក Keir Starmer នៅថ្ងៃព្រហស្បតិ៍ (ទី៨ ខែសីហា) នេះ បាននិយាយថា ការផ្ដន្ទាទោសយ៉ាងធ្ងន់ធ្ងរ ដែលត្រូវបានធ្វើឡើង ចំពោះអ្នកពាក់ព័ន្ធក្នុងការបង្កភាពវឹកវរ គឺជាការបញ្ជូននូវ «សារដ៏មានឥទ្ធិពល» និងរួមចំណែកដល់ការទប់ស្កាត់កុំឲ្យមានអំពើហិង្សាបន្ថែមទៀត។

វត្តមានសន្តិសុខដ៏ច្រើន នៅទូទាំងចក្រភពអង់គ្លេស និង «ការបង្ហាញនូវសាមគ្គីភាព» ពីសហគមន៍មូលដ្ឋាន បានរារាំងការកើតឡើងម្តងទៀតនូវកុបកម្មដែលត្រូវបានឃើញរីករាលដាល នៅក្នុងប៉ុន្មានថ្ងៃថ្មីៗនេះ ដែលពាក់ព័ន្ធនឹងការវាយប្រហារប្រកាន់ពូជសាសន៍សំដៅលើជនមូស្លីម និងជនអន្តោប្រវេសន៍។

គួរបញ្ជាក់ថា ចក្រភពអង់គ្លេសបានកើតមាននូវអំពើកុបកម្មជាបន្តបន្ទាប់ បន្ទាប់ពីការសម្លាប់ក្មេងស្រីវ័យជំទង់ ៣នាក់ នៅក្នុងការវាយប្រហារដោយចាក់នឹងកាំបិត កាលពីថ្ងៃទី២៩ ខែកក្កដា នៅទីក្រុង Southport ភាគពាយព្យនៃប្រទេសអង់គ្លេស ដោយហេតុការណ៍នោះបានបង្កឲ្យមានការបង្ហោះជាបន្តបន្ទាប់នូវព័ត៌មានមិនពិតតាមអ៊ីនធឺណិត ដែលកំណត់អត្តសញ្ញាណឃាតក ដោយសង្ស័យថា ជាជនអន្តោប្រវេសន៍អ៊ិស្លាម។

ក្រុមស្តាំនិយមជ្រុលដែលប្រឆាំងនឹងអន្តោប្រវេសន៍ គ្រោងនឹងធ្វើការប្រមូលផ្តុំជាច្រើនកន្លែង នៅទូទាំងចក្រភពអង់គ្លេស កាលពីថ្ងៃពុធ (ទី៧ ខែសីហា)៕