អ្នកនាំពាក្យនគរបាល បានប្រាប់ឲ្យដឹងថា យ៉ាងហោចណាស់មនុស្ស ២០នាក់ បានបាត់បង់ជីវិត នៅពេលដែលទូកឈើមួយ បានឆេះ ហើយផ្ទុះ នៅទន្លេ ក្នុងរដ្ឋឆ្នេរសមុទ្រ Bayelsa របស់ប្រទេសនីហ្សេរីយ៉ា កាលពីថ្ងៃពុធ (ទី៧ ខែសីហា)។

អ្នកនាំពាក្យនគរបាលប្រចាំរដ្ឋ Bayelsa គឺលោក Musa Muhammed នៅថ្ងៃព្រហស្បតិ៍ (ទី៨ ខែសីហា) នេះ បាននិយាយថា ទូកនេះកំពុងដឹកពាណិជ្ជករ ដែលដឹកជញ្ជូនទំនិញទៅកាន់សហគមន៍ឆ្នេរសមុទ្រនានា។ ពាណិជ្ជករទាំងនោះធ្វើដំណើរប្រចាំសប្តាហ៍ រវាងកន្លែងតាំងទីលំនៅតាមឆ្នេរ និងរដ្ឋធានី Yenagoa របស់រដ្ឋ Bayelsa។

គួរបញ្ជាក់ថា មនុស្សមិនតិចជាង ២០០នាក់នោះទេ ត្រូវបានរាយការណ៍ថា បានស្លាប់នៅក្នុងឧបទ្ទវហេតុពេលធ្វើដំណើរតាមទូក នៅក្នុងប្រទេសនីហ្សេរីយ៉ា កាលពីឆ្នាំមុន ដោយជាទូទៅ អាជ្ញាធរបានស្ដីបន្ទោសដល់ការផ្ទុកលើសចំណុះ និងការថែទាំមិនបានល្អ៕