ក្រុមមន្ត្រីបាននិយាយកាលពីថ្ងៃព្រហស្បតិ៍ (០៨ សីហា) ថា ចំនួនអ្នកស្លាប់ដោយសារភ្លៀងមូសុងដ៏ខ្លាំងក្លាជិតប្រាំមួយសប្តាហ៍ និងទឹកជំនន់ដ៏គំហុកនៅទូទាំងប្រទេសប៉ាគីស្ថាន បានកើនឡើងដល់ ១៥៦នាក់ ខណៈដែលភ្លៀងនៅតែបន្តធ្លាក់ក្នុងផ្នែកជាច្រើននៃប្រទេស ដោយបានជន់លិចភូមិមួយចំនួន និងបណ្តាលឱ្យមានបំណាក់ដី។

អាជ្ញាធរជាតិគ្រប់គ្រងគ្រោះមហន្តរាយបាននិយាយថា លំនៅឋានជាង ១.៨០០ខ្នងត្រូវបានខូចខាតចាប់តាំងពីថ្ងៃទី០១ ខែកក្កដាមក នៅពេលដែលភ្លៀងមូសុងបានចាប់ផ្តើមធ្លាក់។ ប៉ាគីស្ថាន ស្ថិតក្នុងពាក់កណ្តាលរដូវខ្យល់មូសុងប្រចាំឆ្នាំ ដែលចាប់ផ្តើមពីខែកក្កដា ដល់ខែកញ្ញា។ ក្រុមអ្នកវិទ្យាសាស្ត្រ និងអ្នកព្យាករណ៍អាកាសធាតុបានបន្ទោសបម្រែបម្រួលអាកាសធាតុថាជាមូលហេតុនៃភ្លៀងធ្លាក់ខ្លាំងក្នុងប៉ុន្មានឆ្នាំថ្មីៗនេះ។

កាលឆ្នាំ២០២២ នៅពេលដែលមានភ្លៀងធ្លាក់ដែលបង្កឡើងដោយបញ្ហាអាកាសធាតុ បានធ្វើឱ្យទន្លេជោរជន់ និងជន់លិចប្រហែលមួយភាគបីនៃប្រទេស ដោយបានសម្លាប់មនុស្សចំនួន ១.៧៣៩នាក់ និងបង្កការខូចខាតចំនួន ៣០ពាន់លានដុល្លារ។ រដូវមូសុងនេះ តំបន់ដែលគ្រប់គ្រងដោយប៉ាគីស្ថាន គឺតំបន់ជម្លោះភ្នំហិម៉ាឡៃ កាស្មៀរ (Kashmir) ក៏ត្រូវបានវាយលុកដោយភ្លៀងធ្លាក់ខ្លាំងបណ្តាលឱ្យមានបំណាក់ដី។

យោងតាមទីភ្នាក់ងារគ្រោះមហន្តរាយ និងអាជ្ញាធរខេត្តបានឱ្យដឹងថា មនុស្សភាគច្រើនក្នុងចំណោមអ្នកស្លាប់ចំនួន ១៥៦នាក់នោះ ស្ថិតនៅក្នុងខេត្ត ភុនចាប (Punjab) ភាគខាងកើត និងភាគពាយព្យនៃខេត្ត ខាយប៊័រ ផាកធុនខ្វា (Khyber Pakhtunkhwa)។ មន្ត្រីបាននិយាយថា មនុស្សជិត ៣០០នាក់បានរងរបួសផងដែរនៅក្នុងឧប្បត្តិហេតុដែលទាក់ទងនឹងភ្លៀង ហើយអាជ្ញាធរកំពុងផ្តល់អាហារដោយឥតគិតថ្លៃ និងការថែទាំសុខភាពដល់ប្រជាពលរដ្ឋដែលរងផលប៉ះពាល់ដោយភ្លៀងធ្លាក់ដ៏ខ្លាំងក្លានេះ៕