ប្រទេសជប៉ុន បានប្រារព្ធខួបលើកទី៧៩ នៃការទម្លាក់គ្រាប់បែកបរមាណូនៅទីក្រុង Nagasaki ក្នុងអំឡុងសង្គ្រាមលោកលើកទីពីរ។ ទីក្រុងនេះ បានគោរពវិញ្ញាណក្ខន្ធដល់ជនរងគ្រោះរាប់ម៉ឺននាក់ នៅក្នុងពិធីប្រចាំឆ្នាំ ដែលមានអ្នកតំណាងមកពីជុំវិញពិភពលោកចូលរួម។ ប៉ុន្តែអវត្តមានគួរឲ្យកត់សម្គាល់មួយចំនួន ក្នុងចំណោមអ្នកការទូតបរទេស។

បញ្ជីរាយឈ្មោះជនរងគ្រោះដែលត្រូវបានធ្វើបច្ចុប្បន្នភាព ត្រូវបានដាក់នៅកន្លែងរំលឹកខួបអនុស្សាវរីយ៍ ក្នុងអំឡុងពេលប្រារព្ធពិធី។ វារួមបញ្ចូលទាំងឈ្មោះអ្នកដែលបាននៅរស់រានមានជីវិត ដែលបានស្លាប់ក្នុងរយៈពេល១២ ខែកន្លងទៅនេះ។

ចំនួនអ្នកស្លាប់មានចំនួន ១៩៨.៧៨៥នាក់។ ទីក្រុងនេះ ត្រូវបានគេសង្កេតឃើញមានភាពស្ងប់ស្ងាត់មួយសន្ទុះ នៅវេលាម៉ោង១១និង២នាទីព្រឹក ម៉ោងក្នុងតំបន់ ជាពេលវេលាពិតប្រាកដ ដែលគ្រាប់បែកត្រូវបានបំផ្ទុះ នៅថ្ងៃទី៩ ខែសីហា ឆ្នាំ១៩៤៥។

អភិបាលក្រុង លោក Suzuki Shiro បានថ្លែងសេចក្តីប្រកាសសន្តិភាព។ លោក បានអំពាវនាវឲ្យមេដឹកនាំពិភពលោក ស្វែងរកដំណោះស្រាយផ្នែកការទូត ក្នុងពេលមានជម្លោះនៅអ៊ុយក្រែន និងមជ្ឈិមបូព៌ា ដែលនៅតែបន្ត។

ឯកអគ្គរដ្ឋទូត មកពីក្រុមប្រទេសចំនួនប្រាំពីរ ឬG7 លើកលែងតែប្រទេសជប៉ុន ពុំបានចូលរួមក្នុងពិធីនេះទេ។ នោះ គឺជាការឆ្លើយតបទៅនឹងការសម្រេចចិត្តរបស់ លោក Suzuki ដែលមិនអញ្ជើញឯកអគ្គរដ្ឋទូត អ៊ីស្រាអែល។

លោកបាននិយាយថា ជំហររបស់លោក ពុំមែនជារឿងនយោបាយនោះទេ ប៉ុន្តែមានគោលបំណងធានាបានបរិយាកាសស្ងប់ស្ងាត់ និងអធិកអធមនៅថ្ងៃសុក្រនេះ។