ភ្នំពេញ៖ ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃ​និយ័តករ​មូល​បត្រ​កម្ពុជា (ន.ម.ក.) កាលពីកន្លងទៅនេះ បានស្វាគមន៍​ដំណើរ​ទស្សនកិច្ច​សិក្សា​របស់​គណៈ​ប្រតិភូ​ផ្សារ​មូលបត្រប៊ូតាន (RSEB) ដឹកនាំដោយ លោកនាយកប្រតិបត្តិ Dorji Phuntsho ក្នុង​គោល​បំណងបង្កើតទំនាក់ទំនងទ្វេភាគី ដើម្បីជំរុញការអភិវឌ្ឍទីផ្សារមូលបត្រនៃប្រទេសទាំងពីរ។

ឯកឧត្តមអគ្គនាយក ស៊ូ សុជាតិ នៅក្នុងសេចក្តីប្រកាសព័ត៌មាន ចេញផ្សាយនៅថ្ងៃទី៨ សីហា ឆ្នាំ​២០២៤​នេះ បានមានប្រសាសន៍ថា ដំណើរ​ទស្សនកិច្ច​សិក្សា​របស់​គណៈប្រតិភូ​ផ្សារ​មូល​បត្រ​ប៊ូតាន​ គឺសិក្សាអំពីបទពិសោធន៍របស់និយ័តករមូលបត្រកម្ពុជា ពាក់ព័ន្ធ​នឹង​ការជំរុញ​ការ​អភិវឌ្ឍ​ហិរញ្ញ​វត្ថុ​និរន្តរភាព តាមរយៈការជំរុញការបោះផ្សាយសញ្ញាបណ្ណបៃតង សញ្ញាបណ្ណសង្គម និង​សញ្ញា​បណ្ណចីរភាពនៅកម្ពុជា។

ឯកឧត្តម មានសុទិដ្ឋិនិយមថា តាមរយៈការចែករំលែកពីការអភិវឌ្ឍទីផ្សារសញ្ញាបណ្ណនិរន្តរភាពនៅកម្ពុជាពេលនេះ នឹងនំាមកនូវពុទ្ធិបន្ថែមសម្រាប់ផ្សារមូលបត្រប៊ូតាន ដកស្រង់បទពិសោធន៍ថ្មីៗ ដើម្បីអភិវឌ្ឍទីផ្សារសញ្ញាបណ្ណនិរន្តរភាពក្នុងបរិបទប្រទេសប៊ូតាន។ ជាមួយគ្នានេះ តាមរយៈកិច្ចសហប្រតិបត្តិការនេះដែរ ទំនាក់ទំនង រវាងនិយ័តករមូលបត្រកម្ពុជា និងមូលបត្រប៊ូតាន នឹងត្រូវបានពង្រឹង និងពង្រីកជាបន្តបន្ទាប់ ហើយឯកឧត្តមសង្ឃឹមទៀតថា ទីផ្សារមូលបត្រប្រទេសទាំងពីរ នឹងរីកចម្រើនជាមួយគ្នានាពេលអនាគត តាមរយៈការសិក្សា និងចែករំលែកជាមួយគ្នា ដើម្បីលើកកម្ពស់ការអភិវឌ្ឍប្រកបដោយនិរន្តរភាព និងដោះស្រាយបញ្ហាប្រឈមបរិស្ថានតាមរយៈយន្តការទីផ្សារមូលបត្រ។

លោកនាយកប្រតិបត្តិផ្សារមូលបត្រប៊ូតាន បានមានប្រសាសន៍ថា មូលបត្រប៊ូតាន មានការស្ញប់ស្ងែងចំពោះព្រឹត្តិការណ៍សំខាន់ៗ របស់កម្ពុជា ក្នុងការលើកកម្ពស់ការអភិវឌ្ឍប្រកបដោយនិរន្តរភាព និងការដោះស្រាយបញ្ហាប្រឈមបរិស្ថានតាមរយៈការបោះផ្សាយសញ្ញាបណ្ណបៃតង និងសញ្ញបណ្ណចីរភាព។ ដោយពិចារណាលើទំហំ និងលក្ខណៈនៃទីផ្សារមូលធននៅក្នុងបរិបទនៃទីផ្សារប្រទេសប៊ូតាន គោលបំណង គឺដើម្បីសិក្សាពីរបៀបដែលនិយ័តករ និងភាគីពាក់ព័ន្ធដំណើរការបោះផ្សាយលក់សញ្ញាបណ្ណប្រភេទនេះ។

បើតាមនិយ័តករមូលបត្រកម្ពុជា ដំណើរទស្សនកិច្ចនេះ មានសមាសភាពចូលរួមពីថ្នាក់ដឹកនាំ និងមន្ត្រីជាន់ខ្ពស់នៃនិយ័តករមូលបត្រកម្ពុជា និងមូលបត្រប៊ូតាន ដែលបន្ថែមលើការពិភាក្សាអំពីទីផ្សារសញ្ញាបណ្ណនិរន្តរភាពនៅកម្ពុជា ក៏មានការពិភាក្សាផងដែរអំពីវឌ្ឍនភាពទីផ្សារ និងបរិស្ថានសាកល្បងបច្ចេកវិទ្យាហិរញ្ញវត្ថុក្នុងវិស័យមូលបត្រ៕