ប្រធានគណៈកម្មាធិការការពារជាតិនៃសភាអាល្លឺម៉ង់ លោក Marcus Faber បាននិយាយថា លោកមិនយល់ទាស់ចំពោះអ៊ុយក្រែន ដែលបានប្រើប្រាស់រថក្រោះអាល្លឺម៉ង់ នៅក្នុងប្រទេសរុស្ស៊ីនោះទេ។

សមាជិកសភារូបនេះ បានប្រាប់ក្រុមប្រព័ន្ធផ្សព្វផ្សាយ Funke ថា៖«បន្ទាប់ពីបញ្ជូនទៅអ៊ុយក្រែន ពួកវា គឺជាអាវុធរបស់អ៊ុយក្រែន ដែលអាចប្រើប្រាស់គ្រឿងយុទ្ធោបករណ៍ណាមួយ រួមទាំងរថក្រោះ Leopard 2 ផងដែរនោះ»។

លោក Faber បាននិយាយថា ទាំងរុស្ស៊ី និងអ៊ុយក្រែន គឺជា «តំបន់សង្គ្រាម» ។

លោកបានបន្តថា៖ «ការប្រើអាវុធ គឺស្របតាមបទប្បញ្ញត្តិនៃច្បាប់អន្តរជាតិ»។

សារព័ត៌មាន Bild បានរាយការណ៍ថា កងកម្លាំងអ៊ុយក្រែន បានប្រើប្រាស់យានយន្តប្រយុទ្ធរបស់អាល្លឺម៉ង់ Marder យ៉ាងហោចណាស់ បីគ្រឿង នៅក្នុងតំបន់ Kursk ។

កងកម្លាំងអ៊ុយក្រែន បានចាប់ផ្តើមការវាយប្រហារដ៏ធំមួយលើតំបន់ Kursk កាលពីថ្ងៃទី ៦ ខែសីហានេះ។ ការជូនដំណឹងអំពីការវាយប្រហារដោយមីស៊ីល ត្រូវបានចេញជាញឹកញាប់នៅក្នុងតំបន់ ចាប់តាំងពីពេលនោះមក។ យ៉ាងហោចណាស់អ្នកស្រុក ៥នាក់ ត្រូវបានសម្លាប់នៅក្នុងការបាញ់ផ្លោង និងការវាយប្រហារដោយយានដ្រូន ហើយ ៣០នាក់ផ្សេងទៀត បានរងរបួស ក្នុងនោះមានកុមារ៩នាក់។ មន្ទីរពេទ្យបានទទួលអ្នករបួស ៣៤នាក់ ក្នុងនោះមានកុមារ ៥នាក់។ អ្នកស្រុកខ្លះ កំពុងត្រូវបានជម្លៀសទៅកាន់តំបន់ រុស្ស៊ីផ្សេងទៀត រួមទាំងទីក្រុងមូស្គូ និងតំបន់មូស្គូ។