ការអះអាងមិនពិត ឬការផ្ដល់ព័ត៌មានខុស អំពីការបោះឆ្នោត នៅសហរដ្ឋអាមេរិក តាមរយៈការបង្ហោះនៅលើបណ្ដាញសង្គម X ដោយលោក Elon Musk បានប្រមូលបានការចូលមើលជិត ១,២ពាន់លានដង ក្នុងឆ្នាំ២០២៤។ នេះបើតាមអង្គការឃ្លាំមើល ដែលបានរាយការណ៍កាលពីថ្ងៃព្រហស្បតិ៍ (ទី៨ ខែសីហា) ដោយបង្ហាញពីឥទ្ធិពលដ៏មានសក្តានុពលរបស់លោកមហាសេដ្ឋីរូបនេះ ជុំវិញការប្រកួតប្រជែងដណ្ដើមកៅអីសេតវិមាន ដែលមានការបែកបាក់យ៉ាងខ្លាំង។

នៅមុនការបោះឆ្នោតខែវិច្ឆិកា អ្នកស្រាវជ្រាវបានលើកឡើងថា បណ្ដាញសង្គម X (ពីមុនជា Twitter) គឺជាកន្លែងផ្ដល់ព័ត៌មានមិនពិតខាងនយោបាយ។ ពួកគេក៏បានបញ្ជាក់ផងដែរថា លោក Musk ដែលបានទិញវេទិកានេះ ក្នុងឆ្នាំ២០២២ និងជាអ្នកគាំទ្រសំឡេងរបស់លោក Donald Trump ហាក់ដូចជាកំពុងមានឥទ្ធិពលលើអ្នកបោះឆ្នោត ដោយការផ្សព្វផ្សាយព័ត៌មានមិនពិត នៅលើគណនីផ្ទាល់ខ្លួនរបស់លោក។

គួរបញ្ជាក់ថា កាលពីសប្តាហ៍មុន លោក Musk បានប្រឈមនឹងការរិះគន់ ចំពោះការចែករំលែកជាមួយអ្នកតាមដានរបស់លោកនូវវីដេអូក្លែងក្លាយនៃបញ្ញាសិប្បនិម្មិត (AI) ដែលបង្ហាញពីគូប្រជែងរបស់លោក Trump គឺអនុប្រធានាធិបតីអាមេរិក លោកស្រី Kamala Harris របស់ប្រជាធិបតេយ្យ។

នៅក្នុងវីដេអូនោះ ការបញ្ចេញសំឡេងដែលធ្វើត្រាប់តាមលោកស្រី Harris ហៅប្រធានាធិបតីលោក Joe Biden ថា ជាមនុស្សចាស់ មុននឹងប្រកាសថា លោកស្រីមិនដឹងអំពីកិច្ចការដំបូង ក្នុងការដឹកនាំប្រទេសនោះទេ។ វីដេអូដែលមានអ្នកចូលមើលរាប់លាននាក់នោះ មិនបានបង្ហាញថា វាជាការលេងសើចនោះទេ ដោយរក្សាទុកកម្សាន្ត។ ក្រោយមកទើបលោក Musk បញ្ជាក់ថា នេះគ្រាន់តែវីដេអូកំប្លែងប៉ុណ្ណោះ៕