​បាល់ទាត់៖ ​សមាគម​បាល់ទាត់​ទ្វីប​អឺរ៉ុបបានប្រកាស​ពី​ការអនុញ្ញាត ឱ្យ​អ្នកគាំទ្រ​ក្រុម​ភ្ញៀវ​ចូល​ទស្សនាការ​ប្រកួត​ផ្ទាល់​បាន​ឡើងវិញ ​ក្នុងការ​ប្រកួត​នៅ​ក្របខណ្ឌ​អឺរ៉ុប​ចាប់ពី​សប្តាហ៍​ក្រោយ​តទៅ​។ ​​មានន័យថា ​អ្នកគាំទ្រ​ក្រុម​ភ្ញៀវ​នឹង​អាច​ទៅ​ទស្សនា​ការប្រកួត​ក្រៅ​ដី ​របស់​ក្រុម​ដែល​ខ្លួន​គាំទ្រនៅ​ក្របខណ្ឌ UEFA Champions League, Europa League និង Europa Conference League​។

​​យ៉ាងណាក្តី​នេះ​គឺជា​ការសំរេច​លើកលែង​ឡើងវិញ​របស់ UEFA ប៉ុណ្ណោះ តែ​ជាក់ស្តែង​ក៏​អាស្រ័យ​ទៅ​លើ​រដ្ឋាភិបាល​នៃ​ប្រទេស​ម្ចាស់ផ្ទះ​នីមួយៗ និង​នៅតែ​បន្ត​គោរព​តាម​វិធានការ​សុខាភិបាល​ដដែល​។ ​​រំលឹកថា ​អ្នកគាំទ្រ​ក្រុម​ភ្ញៀវ​ត្រូវបាន​ហាមឃាត់​មិនឱ្យ​ទស្សនា​ផ្ទាល់ តាំងពី​ពេល​ផ្ទុះឡើង​ដំបូង​នៃ​មេរោគ​រាតត្បាត Covid-19 ហើយ​ក្រោយមក​អ្នកគាំទ្រ​ក្នុង​ចំនួន​ដែល​បានកំណត់​ ត្រូវបាន​អនុញ្ញាត​ឱ្យចូល​ទ​ស្សនា​ការប្រកួត​វគ្គ​ផ្តាច់ព្រ័ត្រ Champions League និង Europa League កាលពី​ខែឧសភា​កន្លងទៅ​។

​ការ​រឹតត្បិត​វិធានការ​សុខាភិបាល​ ត្រូវបាន​អនុវត្ត​ខុសៗ​គ្នា​ទៅតាម​ប្រទេស​នីមួយ​។ ឧទាហរ​ណ៍​ស៊ុយអែត​ដែល Chelsea ធ្វើដំណើរ​ទៅ​ជួប Malmo នៅ​ថ្ងៃទី២ ខែវិច្ឆិកា បច្ចុប្បន្ន​ស៊ុយអែត​ហាមឃាត់​រាល់​ការធ្វើដំណើរ​ដែល​មិនចាំបាច់​ពី​ចក្រភព​អង់គ្លេស មិន​ខុសពី​ប្រទេស​ហូ​ឡង់​ដែល Vitesse Arnhem ធ្វើជា​ម្ចាស់ផ្ទះ Spurs នៅ​ថ្ងៃទី២១ ខែតុលា​។​ ​ផ្ទុយទៅវិញ​អ្នកគាំទ្រ​ក្រុម​ហង្ស​ក្រហម Liverpool ដែល​ធ្វើដំណើរ​ទៅ​ប្រទេស​ព័រទុយហ្កាល់​ សម្រាប់​ការប្រកួត​ជាមួយ​ក្រុម Porto នៅ​ថ្ងៃទី២៨ ខែកញ្ញា ​គ្រាន់តែ​ត្រូវការ​បង្ហាញ​ភស្តុតាង​នៃ​ការចាក់​វ៉ាក់សាំង និង​តេស្ត​រហ័ស​រក​មេរោគ Covid-19 ជាដើម​៕

​អត្ថបទ​៖​នាង សុភា​វុ​ធ