ក្រសួងការពារជាតិ បាននិយាយថា ប្រទេសរុស្ស៊ី កាលពីថ្ងៃសុក្រ បានដាក់ពង្រាយទាហាន និងគ្រាប់រំសេវបន្ថែមទៀត ទៅកាន់តំបន់ព្រំដែន ដែលអ៊ុយក្រែនបានធ្វើការវាយលុកតាមជើងគោកទ្រង់ទ្រាយ ធំ។ 

អ៊ុយក្រែន និយាយថា ការវាយប្រហាររបស់រុស្ស៊ីទៅលើផ្សារទំនើបមួយកន្លែង នៅភាគខាងកើតទឹកដីរបស់ខ្លួន បានសម្លាប់មនុស្ស ១៤នាក់។

កងទ័ពអ៊ុយក្រែន បានបើកការវាយលុកដ៏គួរឱ្យភ្ញាក់ផ្អើលមួយទៅកាន់ទីក្រុង Kursk ភាគខាងលិចរបស់រុស្ស៊ី កាលពីថ្ងៃអង្គារ នៅក្នុងការវាយប្រហារឆ្លងកាត់ព្រំដែន ចាប់តាំងពីទីក្រុងមូស្គូ បានឈ្លានពានកាលពីខែកុម្ភៈ ឆ្នាំ២០២២។

ប្រព័ន្ធផ្សព្វផ្សាយរដ្ឋ បានរាយការណ៍ថា ក្រសួងការពារជាតិរុស្ស៊ី បាននិយាយថា ខ្លួនកំពុងបញ្ជូនគ្រាប់រ៉ូកែត កាំភ្លើងធំ រថក្រោះ និងរថយន្តដឹកទំនិញធុនធ្ងន់ ដើម្បីពង្រឹងការការពាររបស់ខ្លួននៅក្នុងតំបន់។

ទីក្រុងមូស្គូ បាននិយាយថា ទាហានអ៊ុយក្រែនប្រហែល ១.០០០នាក់ រថពាសដែកនិងយានយន្តជាង២០គ្រឿង បានចូលរួមក្នុងការវាយប្រហារដំបូង ទោះបីជាក្រោយមក បានអះអាងថាបានបំផ្លាញសម្ភារៈជាច្រើនក៏ដោយ។

 ខណៈអ៊ុយក្រែន ពុំបានបញ្ជាក់ជាផ្លូវការនូវការវាយលុកនេះ ប្រធានាធិបតី លោក Volodymyr Zelenskyy បាននិយាយថា រុស្ស៊ីចាំបាច់ត្រូវ គិតពីផលវិបាកនៃការឈ្លានពានរបស់ខ្លួន។

កាលពីថ្ងៃសុក្រ ភាគីទាំងពីរ បានបង្កើនការវាយប្រហារតាមអាកាសយ៉ាងខ្លាំង។ 

អគ្គរដ្ឋអាជ្ញាអ៊ុយក្រែន បាននិយាយថា ការវាយប្រហារដោយមីស៊ីលរបស់រុស្សីទៅលើផ្សារទំនើប និងការិយាល័យប្រៃសណីយ៍នៅភាគខាងកើតទីក្រុង Kostyantynivka របស់អ៊ុយក្រែន បានសម្លាប់មនុស្សយ៉ាងហោចណាស់១៤នាក់ និងរងរបួស៤៣នាក់។