ទីភ្នាក់ងារព័ត៌មានផ្លូវការ IRNA បានរាយការណ៍កាលពីថ្ងៃសុក្រថា មេបញ្ជាការយោធាជាន់ខ្ពស់អ៊ីរ៉ង់មួយរូប បាននិយាយថា ទីក្រុងតេអេរ៉ង់ បានចាត់ទុកការសងសឹកចំពោះការធ្វើឃាតប្រធានការិយាល័យនយោបាយរបស់ហាម៉ាសលោក អ៊ីស្មេល ហានីយេ ( Ismail Haniyeh) ជាកាតព្វកិច្ចរបស់ខ្លួន។

របាយការណ៍ បាននិយាយថា លោក Esmaeil Qa'ani មេបញ្ជាការនៃកងកម្លាំង Quds នៃកងឆ្មាំបដិវត្តន៍ឥស្លាមអ៊ីរ៉ង់ បានធ្វើការអត្ថាធិប្បាយនៅក្នុងលិខិតមួយអបអរសាទរលោក Yahya Sinwar ចំពោះការតែងតាំងរបស់លោក ជាប្រធានការិយាល័យនយោបាយរបស់ក្រុមហាម៉ា និងចូលរួមរំលែកទុក្ខចំពោះការ ស្លាប់របស់លោក ហានីយេ។  

លោក Qa'ani បានបញ្ជាក់ថា៖«យើងចាត់ទុកថា វាជាកាតព្វកិច្ចរបស់យើង ក្នុងការសងសឹកឲ្យលោក ហានីយេ ដែលត្រូវបានសម្លាប់ នៅក្នុងឧប្បត្តិហេតុ «ដ៏ជូរចត់»នៅក្នុងប្រទេសអ៊ីរ៉ង់។

លោក Qa'ani បាននិយាយថា៖«ការតស៊ូដោយវីរភាព»របស់ក្រុមតស៊ូ នឹងបង្កើនការដាក់ទណ្ឌកម្មឲ្យកាន់តែខ្លាំង។

ក្រុមហាម៉ាស បានប្រកាសកាលពីថ្ងៃអង្គារថា លោក Sinwar ដែលជាមេដឹកនាំក្រុមនៅតំបន់ហ្កាហ្សាស្ទ្រីប ចាប់តាំងពីឆ្នាំ ២០១៧ នឹងមកជំនួសតំណែងអតីតមេដឹកនាំ លោក អ៊ីស្មេល ហានីយេ ដែលត្រូវបានធ្វើឃាតនៅទីក្រុងតេអេរ៉ង់ កាលពីសប្តាហ៍មុន។