​បាល់ទាត់៖ ក្រុម​ភ្នំពេញ​ក្រោ​នបាន​តាម​ស្មើ​ពិន្ទុ​ក្រុម​កំពូល​តារាង​វិសាខា ក្នុង​ក្របខណ្ឌ​លី​គ​កំពូល​កម្ពុជាឆ្នាំ​២០២១ ហើយ បន្ទាប់ពី​យកឈ្នះ​ក្រុម​ម្ចាស់ផ្ទះ​នគរបាលជាតិដោយ​លទ្ធផល ៤-១ នៅ​ទីលាន 7NG កាលពី​ល្ងាច​ថ្ងៃទី​០៨ ខែកញ្ញា ឆ្នាំ​២០២១។​

​ជំនួប​បង្គ្រប់​សប្ដាហ៍​ទី​៧ នេះ ក្រុម​ភ្នំពេញ​ក្រោ​នបានដាក់​សម្ពាធ​លើ​ក្រុម​នគរបាលជាតិរហូត​រកបាន ៤​គ្រាប់​មុនដោយ​កីឡាករ Matheus Souza E.Silva នៅ​នាទី​២៧, កីឡាករ Yadai Ogawa នៅ​នាទី​២៩ និង​កីឡាករ Adres Nieto រកបាន ២​គ្រាប់​ម្នាក់ឯងនៅ​នាទី​៥៨ និង​នាទី​៧១។​ ​ដោយឡែក​ក្រុម​នគរបាលជាតិវាយបក​បាន ១​គ្រាប់​ប៉ុណ្ណោះដោយ​ការទា​ត់បាល់​ពិន័យ ១១​ម៉ែត្រនៅ​នាទី​៨២ ដោយ​កីឡាករ Otani Soma។ យ៉ាងណាមិញ​មុន​ទទួលបាន ៣​ពិន្ទុ​ត្រឡប់ទៅផ្ទះ​វិញ ភ្នំពេញ​ក្រោ​នបាន​បាត់បង់​សមាជិក​ម្នាក់គឺ​កីឡាករ Yadai Ogawa ក្រោយ​ទទួលបាន​ការពិន័យ​កាត​លឿង​លើក​ទី​២ ស្មើនឹង​កាត​ក្រហមនៅ​នាទី​៨៦។​

​សម្រាប់​ជ័យជម្នះ​ក្រៅ​ដី​នេះដែរ បានធ្វើ​ឲ្យ​ក្រុម​សិង្ហ​ក្រហម​ភ្នំពេញ​ក្រោ​នបន្ដ​កំណត់ត្រា​មិនទាន់​ស្គាល់​ចាញ់ និង​រកបាន ២៥​ពិន្ទុស្មើ​ក្រុម​កំពូល​តារាង​វិសាខាបន្ទាប់ពី​ឆ្លងកាត់ ១១​ប្រកួត​ឈ្នះ៧ និង​ស្មើ ៤​ប្រកួត​ដូចគ្នា។ ប៉ុន្ដែ​ប្រកួត​បន្ទាប់ ភ្នំពេញ​ក្រោ​ននឹងត្រូវ​ធ្វើការ​ងារ​ធ្ងន់ដោយ​ត្រូវ​ជួប​ក្រុម​ឡើង​ជើង​អង្គ​រថា​យ​ហ្គឺ​រ នៅ​ទឹកដី​ខេត្តសៀមរាបនា​ថ្ងៃទី​១២ ខែកញ្ញា​ចុង​សប្ដាហ៍​នេះ។​ ​ដោយឡែក​ក្រុម​នគរបាលជាតិបាន​បន្ដ​ឈរ​បាត​តារាង ជាមួយ​កំណត់ត្រា​មិនទាន់​ស្គាល់​ឈ្នះ​សោះបន្ទាប់ពី​ឆ្លងកាត់ ១០​ប្រកួត​ស្មើ៣ និង​ចាញ់ ៧​ប្រកួតទើប​រកបាន ៣​ពិន្ទុ​ប៉ុណ្ណោះ៕

​អត្ថបទ៖ លី ឈុន​ឡា