សារព័ត៌មានរ៉យទ័រ បានរាយការណ៍ថា បណ្តាប្រទេសនៅអឺរ៉ុបខាងកើតកំពុងប្រឈមមុខនឹងការលំបាកក្នុងការជ្រើសរើសបុគ្គលិក ខណៈដែលពួកគេកំពុងតស៊ូក្នុងការរៀបចំសម្រាប់ជម្លោះដែលអាចកើតមានជាមួយរុស្ស៊ី។ 

យោងតាមទីភ្នាក់ងារសារព័ត៌មាននេះ អង្គការណាតូ គ្រោងនឹងបង្កើតកងពលតូចបន្ថែមពី ៣៥ ទៅ ៥០ ដើម្បីប្រឈមមុខនឹងរុស្ស៊ី។

សារព័ត៌មានរ៉យទ័រ បានកត់សម្គាល់ថា ហុងគ្រី ប៉ូឡូញ រូម៉ានី ស្លូវ៉ាគី និងសាធារណរដ្ឋឆេក កំពុងប្រឹងបែងជ្រើសរើសទាហានថ្មី។ ជាពិសេស ទីក្រុង Prague បានខកខានគោលដៅជ្រើសរើសបុគ្គលិកអស់ជាច្រើនឆ្នាំ ហើយព្យាយាមរក្សាកម្រិតកងទ័ព។

សារព័ត៌មាននេះ បានសរសេរថា៖«នៅឆ្នាំ ២០២១ ជនជាតិឆេក បានឈានដល់ ៥៦ភាគរយ នៃគោលដៅជ្រើសរើសរបស់ពួកគេ ដោយកើនឡើងដល់ ៨៥ភាគរយ នៅឆ្នាំ ២០២២ នេះបើយោងតាមទិន្នន័យកងទ័ពថ្មីៗនេះ»។

ទីភ្នាក់ងារសារព័ត៌មាន បានដកស្រង់សម្តីប្រធានអគ្គសេនាធិការនៃកងកម្លាំងប្រដាប់អាវុធឆេក លោក Karel Rehka ដោយនិយាយថា៖ «យើងមិនអាចធ្វើអ្វីដោយគ្មានមនុស្សបានទេ ប្រសិនបើយើងធ្វើទំនើបកម្មគ្រឿងយុទ្ធោបករណ៍ ហើយមិនមានមនុស្សមានសមត្ថភាពគ្រប់គ្រាន់ និងមនុស្សដែលមានទឹកចិត្ត នោះ គឺជាការខ្ជះខ្ជាយលុយកាក់»។