សារព័ត៌មានរដ្ឋាភិបាល al-Watan និងសកម្មជន បានរាយការណ៍កាលពីថ្ងៃសុក្រថា កងកម្លាំងប្រជាធិបតេយ្យស៊ីរី (SDF) ដឹកនាំដោយជនជាតិឃើដ បានដាក់ការឡោមព័ទ្ធយ៉ាងតឹងរ៉ឹងលើតំបន់កាន់កាប់ដោយរដ្ឋាភិបាលក្នុងខេត្ត al-Hasakah ភាគឦសាននៃប្រទេសស៊ីរី ខណៈដែលការប៉ះទង្គិចគ្នាជាមួយក្រុមយុទ្ធជនគាំទ្ររដ្ឋាភិបាល នៅតែបន្ត។ 

សារព័ត៌មាន al-Watan បាននិយាយថា អ្នកស្រុកនៅក្នុងផ្នែកដែលគ្រប់គ្រងដោយរដ្ឋាភិបាលនៅខេត្ត al-Hasakah កំពុងប្រឈមមុខនឹងការខ្វះខាតទឹក ម្សៅផលិតពីគ្រាប់ធញ្ញជាតិ ឱសថ និងការផ្គត់ផ្គង់ចាំបាច់ផ្សេងៗទៀត។

ដោយលើកឡើងពីប្រភពក្នុងស្រុក សារព័ត៌មាននេះ បានពណ៌នាស្ថានភាពនេះថាជា «មហន្តរាយ» ដោយកងកម្លាំង SDF រាយការណ៍ថា បានរារាំងគណៈកម្មាធិការអន្តរជាតិនៃកាកបាទក្រហមមិនឲ្យចូលដល់តំបន់ដែលត្រូវបានឡោមព័ទ្ធ។

ការបិទផ្លូវនេះ បានបង្ខំឲ្យអ្នកស្រុកជាច្រើនពឹងផ្អែកលើអណ្តូងទឹកដែលមិនមានសុវត្ថិភាព ដែលនាំឲ្យមានការកើនឡើងនូវករណីពុល ការឆ្លងមេរោគពោះវៀន និងក្អួតជាដើម។