ទីភ្នាក់ងារព័ត៌មាន Tass បានរាយការណ៍ថា មនុស្សជាង ៧៦.០០០នាក់ ត្រូវបានជម្លៀសចេញពីតំបន់ជាប់ព្រំដែនជាមួយអ៊ុយក្រែន ស្ថិតក្នុងតំបន់ Kursk របស់រុស្ស៊ី បន្ទាប់ពីការវាយប្រហាររបស់អ៊ុយក្រែនក្នុងសប្តាហ៍នេះ ។

 ក្រសួងសង្រ្គោះបន្ទាន់ក្នុងស្រុក បានបញ្ចេញរូបភាពវីដេអូឃ្លីបឃើញអ្នកជម្លៀសខ្លួនធ្វើដំណើរទៅដល់ទីក្រុង Oryol ស្ថិតនៅចម្ងាយប្រហែល ១៤០គ.ម ភាគខាងជើងតំបន់ Kursk ។

 រូបភាពវីដេអូឃ្លីបផ្សេងទៀត ឃើញក្រុមគ្រូពេទ្យចិត្តសាស្រ្តជួយពលរដ្ឋឲ្យស្នាក់នៅក្នុងទីជម្រក បណ្តោះអាសន្ន ស្ថិតក្នុងតំបន់ Kursk ។

 កងកម្លាំងរុស្ស៊ី បានទប់ទល់ជាមួយទាហានអ៊ុយក្រែនរាប់ពាន់នាក់ ដែលបានរុលចូលទឹកដីរុស្ស៊ីចម្ងាយ ២០គ.ម នៅក្នុងតំបន់ Kursk ក្រោយការវាយប្រហារធំបំផុតរបស់អ៊ុយក្រែន លើអធិបតេយ្យភាពទឹកដីរុស្ស៊ី ចាប់តាំងពីសង្រ្គាមផ្ទុះឡើងកាលពីឆ្នាំ ២០២២ ។

កាលពីថ្ងៃសុក្រកន្លងទៅ អភិបាលស្តីទីតំបន់ Kursk លោក Alexei Smirnov និយាយប្រាប់លោកប្រធានាធិបតី Vladimir Putin ថា ការជម្លៀសអ្នកស្រុក នឹងត្រូវធ្វើឡើងតាមរថយន្តក្រុង និងរថភ្លើង ។

លោក Putinបានចាត់ទុកការវាយប្រហាររបស់អ៊ុយក្រែនថាជាការបង្ករឿងធំ ហើយលោក Smirnov និយាយថា អ្នកស្រុករាប់ម៉ឺននាក់ ត្រូវបានជម្លៀសខ្លួន ៕