​​អ៊ីស្រាអែល៖ កងទ័ព​អ៊ីស្រាអែល​បាន​បាញ់​គ្រាប់បែក​ផ្សែង​ទៅលើ​ក្រុម​អ្នក​តវ៉ា​ប៉ា​ឡេ​ស្ទី​ន ដែល​បាន​ប្រមូល​ផ្តុំ​គ្នា​នៅ​ច្រក​ទ្វារ​ដា​ម៉ាស់​នៅ​ទីក្រុង​ចាស់ Jerusalem កាលពី​យប់​ថ្ងៃ​ពុធ​ដើម្បី​គាំទ្រ​ដល់​អ្នកទោស​ប៉ា​ឡេ​ស្ទី​ន ៦​នាក់​ដែល​បាន​រត់​គេច​ខ្លួន​ចេញពី​ពន្ធនាគារ​ Gilboa កាលពី​ថ្ងៃ​ចន្ទ​។

​ការ​រត់​គេចខ្លួន​គឺជា​ការ​ហែក​ពន្ធនាគារ​ដ៏​ធំ​បំផុត​របស់​អ៊ីស្រាអែល​ ក្នុង​រយៈពេល​ជាច្រើន​ទសវត្សរ៍​។ បុរស​ទាំង ៦​នាក់​ដែល​បាន​រត់​គេច​ខ្លួន​មាន​អាយុ​ចន្លោះ​ពី ២៦ ទៅ ៤៩​ឆ្នាំ ទំនងជា​ជីក​រូង​ក្រោម​ដី​ចេញពី​ពន្ធនាគារ Gilboa ក្បែរ​តំបន់ West Bank ដែល​កាន់កាប់​ដោយ​អ៊ីស្រាអែល​ហើយ​បាន​រត់​គេច​ខ្លួន​កាលពី​ព្រឹក​ថ្ងៃ​ចន្ទ​។ បុគ្គលិក​សន្តិសុខ​រប​ស់​អ៊ីស្រាអែល​ត្រូវ​បាន​គេ​រាយការណ៍​ថា ​កំពុង​ស៊ើប​អង្កេត​ថា​ តើ​អ្នកទោស​ទាំងនោះ​មាន​ជំនួយ​ពី​មនុស្ស​នៅ​ខាងក្នុង​ពន្ធនាគារ ​ក៏ដូចជា​នៅ​ខាងក្រៅ​ដែរ ​ឬ​យ៉ាងណា​។​ ការ​តាម​ប្រមាញ់​ដ៏​ធំ​នៅ​ភាគ​ខាងជើង​ប្រទេស​អ៊ីស្រាអែល​ និង​តំបន់ West Bank បាន​បន្ត​កាលពី​ថ្ងៃ​ពុធ ​ខណៈ​ដែល​រដ្ឋាភិបាលចម្រុះ​ថ្មី​ព្យាយាម​រក្សា​ភាព​ស្ងប់ស្ងាត់ ​ហើយ​ជនជាតិជ្វី​ហ្វបាន​ប្រារព្ធ​ពិធីរ៉ូ​សហា​សា​ណា (Rosh Hashana) ជា​ពិធីបុណ្យ​ចូល​ឆ្នាំ​ថ្មី​របស់​ជនជាតិ​ជ្វី​ហ្វ​។

​Zakaria Zubeidi អាយុ ៤៦​ឆ្នាំ​ដែល​ត្រូវ​បាន​គេ​ស្គាល់​ថា​ ជា​អ្នក​រត់​គេចខ្លួន​ម្នាក់​ក្នុងចំណោម​អ្នកទោស ៦​នាក់​ដែល​ជា​មេដឹកនាំ​លេចធ្លោ​ម្នាក់​នៅ​ក្នុង​កងពលតូច​អាល់​-​អាក​សា​ទុក្ករបុគ្គល (Al-Aqsa Martyrs Brigade)​ ដែល​ជា​ក្រុម​ប្រដាប់​អាវុធ​មាន​សម្ព័ន្ធ​ភាព​ជាមួយ​ក្រុម​សកម្មប្រយុទ្ធ​ហ្វា​តា ក្នុង​កំឡុង​ពេល​លើក​ទី​ពីរ​ពី​ឆ្នាំ​២០០០​ ដល់​២០០៥ ក្រោយមក​លោក​ត្រូវ​បាន​ផ្តល់​ការ​លើក​លែង​ទោស​ រួម​ជាមួយ​ពួក​សកម្ម​ប្រយុទ្ធ​ដែល​មាន​ទំនាក់ទំនង​ជាមួយ​ក្រុម​ហ្វា​តា ​ប៉ុន្តែ​ត្រូវ​បាន​ចាប់ខ្លួន​ម្តង​ទៀត​នៅ​ឆ្នាំ​២០១៩ ជា​អ្វី​ដែល​អាជ្ញាធរ​អ៊ីស្រាអែល​និយាយ​ថា ​ជា​ការ​សង្ស័យ​ភេរវកម្ម​ថ្មី​៕

អត្ថបទ៖ សុខមាន