ប្រភពពីការិយាល័យនាយករដ្ឋមន្រ្តីចក្រភពអង់គ្លេសបាននិយាយកាលពីថ្ងៃសៅរ៍ (១០ សីហា) ថា លោកនាយករដ្ឋមន្រ្តី គា ស្តាមើ (Keir Starmer) បានលុបចោលថ្ងៃឈប់សម្រាកដែលបានគ្រោងទុករបស់ខ្លួនដើម្បីផ្តោតលើការឆ្លើយតបរបស់រដ្ឋាភិបាលចំពោះកុបកម្មប្រកាន់ជាតិសាសន៍ជាបន្តបន្ទាប់ ដែលផ្តោតលើជនមូស្លីម និងជនអន្តោប្រវេសន៍។

មន្ត្រីនគរបាលរាប់ពាន់នាក់នៅតែបន្តបំពេញកាតព្វកិច្ចនៅចុងសប្តាហ៍ ក្នុងករណីអំពើហិង្សាផ្ទុះឡើងម្តងទៀត បើទោះបីជារយៈពេលបួនថ្ងៃជាប់ៗគ្នាមកនេះ បានមើលឃើញក្រុមបាតុករប្រឆាំងតប មានចំនួនច្រើនជាងក្រុមបាតុករប្រឆាំងជនអន្តប្រវេសន៍នៅក្នុងទីក្រុង និងតំបន់នានាទូទាំងប្រទេសក៏ដោយ។

ប្រភពដែលបាននិយាយក្នុងលក្ខខណ្ឌមិនបញ្ចេញឈ្មោះនោះបានឱ្យដឹងថា លោក Starmer នឹងលែងទៅវិស្សមកាលនៅសប្តាហ៍ក្រោយទៀតហើយ។ រដ្ឋាភិបាលរបស់នាយករដ្ឋមន្រ្តីរូបនេះបានប្រតិបត្តិការយ៉ាងឆាប់រហ័សដើម្បីពន្លឿនការចាប់ខ្លួនអ្នកដែលត្រូវបានគេចោទប្រកាន់ពាក់ព័ន្ធនឹងកុបកម្ម ខណៈនគរបាលបាននិយាយថា ការចាប់ខ្លួនទំនងជាបន្តជាច្រើនខែ។

កាលពីថ្ងៃសៅរ៍ ក្រុមប្រឹក្សាអគ្គស្នងការនគរបាលជាតិ ដែលតំណាងឱ្យថ្នាក់ដឹកនាំនគរបាល បាននិយាយថា មន្ត្រីជំនាញត្រូវបានបញ្ជាឱ្យតាមចាប់ជនល្មើសតាមប្រព័ន្ធអ៊ីនធឺណិត និងបុគ្គលល្បីឈ្មោះក្នុងអនឡាញ ដែលទទួលខុសត្រូវចំពោះការផ្សព្វផ្សាយភាពស្អប់ខ្ពើម និងញុះញង់ឱ្យមានអំពើហិង្សាទ្រង់ទ្រាយធំបែបនេះ។

គួររម្លឹកថា កុបកម្មបានផ្ទុះឡើងបន្ទាប់ពីការបង្ហោះតាមអ៊ីនធឺណិតមិនពិតបានកំណត់អត្តសញ្ញាណជនសង្ស័យដែលជាឃាតករសម្លាប់ក្មេងស្រី ៣នាក់ក្នុងការវាយប្រហារដោយកាំបិតកាលពីថ្ងៃទី២៩ ខែកក្កដានៅទីក្រុង សៅផត (Southport) ភាគពាយព្យនៃដែនដីអង់គ្លេស ថាជាជនអន្តោប្រវេសន៍ជនជាតិអ៊ីស្លាម៕