ប្រភពស៊ើបការណ៍ចារកម្មអ៊ឺរ៉ុបចំនួនពីរបានប្រាប់សារព័ត៌មានរ៉យទ័រថា បុគ្គលិកយោធារុស្ស៊ី រាប់សិបនាក់កំពុងត្រូវបានបណ្តុះបណ្តាលនៅក្នុងប្រទេសអ៊ីរ៉ង់ ដើម្បីប្រើប្រាស់ប្រព័ន្ធមីស៊ីលបាលិស្ទិករយៈចម្ងាយជិតឈ្មោះថា ហ្វាត់-៣៦០ (Fath-360) ដោយបន្ថែមថា ពួកគេរំពឹងថានឹងមានការបញ្ជូនអាវុធដឹកនាំដោយផ្កាយរណបបែបនេះរាប់រយគ្រាប់ទៅកាន់រុស្ស៊ី ក្នុងពេលឆាប់ៗសម្រាប់សង្គ្រាមរបស់ខ្លួននៅអ៊ុយក្រែន។

តំណាងក្រសួងការពារជាតិរុស្ស៊ី ត្រូវបានគេជឿថាបានចុះហត្ថលេខាលើកិច្ចសន្យាមួយកាលពីថ្ងៃទី១៣ ខែធ្នូ នៅទីក្រុងតេអេរ៉ង់ ជាមួយមន្ត្រីអ៊ីរ៉ង់ សម្រាប់ប្រព័ន្ធមីស៊ីល Fath-360 និងប្រព័ន្ធមីស៊ីលបាលិស្ទិកមួយទៀត ដែលសាងសង់ដោយអង្គការឧស្សាហកម្មអវកាស (AIO) គ្រប់គ្រងដោយរដ្ឋាភិបាលអ៊ីរ៉ង់ ហៅថា អាបាប៊ីល (Ababil) នេះបើយោងតាមមន្ត្រីស៊ើបការណ៍សម្ងាត់ ដែលសុំមិនបញ្ចេញឈ្មោះ។

ដោយដកស្រង់ប្រភពស៊ើបការណ៍សម្ងាត់ជាច្រើន ក្រុមមន្ត្រីទាំងនោះបាននិយាយថា បុគ្គលិករុស្ស៊ីបានទៅកាន់អ៊ីរ៉ង់ ដើម្បីរៀនពីរបៀបដំណើរការប្រព័ន្ធការពារ Fath-360 ដែលបាញ់មីស៊ីលរយៈចម្ងាយអតិបរមា ១២០គីឡូម៉ែត្រ និងក្បាលគ្រាប់ទម្ងន់ ១៥០គីឡូក្រាម។ ប្រភពមួយបាននិយាយថា ជំហានបន្ទាប់ដែលអាចធ្វើបន្ទាប់ពីការហ្វឹកហ្វឺននេះនឹងជាការបញ្ជូនមីស៊ីលទាំងនេះទៅឱ្យរុស្ស៊ី។

ក្រុមអ្នកជំនាញយោធានិយាយថា ទីក្រុងមូស្គូមានមីស៊ីលបាលិស្ទិកជាច្រើនរបស់ខ្លួនរួចហើយ ប៉ុន្តែការផ្គត់ផ្គង់ Fath-360 អាចអនុញ្ញាតឱ្យរុស្ស៊ី ប្រើប្រាស់ឃ្លាំងអាវុធរបស់ខ្លួនសម្រាប់គោលដៅឆ្ងាយពីសមរភូមិមុខ ខណៈប្រើប្រាស់ក្បាលគ្រាប់អ៊ីរ៉ង់ សម្រាប់គោលដៅចម្ងាយជិត៕