លោកប្រធានាធិបតីហ្វីលីពីន ហ្វឺឌីណាន ម៉ាកូសជូនៀ (Ferdinand Marcos Jr) កាលពីថ្ងៃអាទិត្យបានរិះគន់សកម្មភាពរបស់កងទ័ពអាកាសចិននៅក្នុងដែនទឹកសមុទ្រចិនខាងត្បូង ដែលអះអាងសិទ្ធិក្រប់គ្រងដោយប្រទេសទាំងពីរ ដោយហៅសកម្មភាពនេះថា មិនសមហេតុផល ខុសច្បាប់ និងគ្មានការប្រុងប្រយ័ត្ន។

ទីក្រុង ម៉ានីល និងទីក្រុងប៉េកាំង បានចោទប្រកាន់គ្នាទៅវិញទៅមកកាលពីថ្ងៃសៅរ៍ពីបទរំខានដល់ប្រតិបត្តិការយោធារបស់ពួកគេនៅជុំវិញតំបន់ ស្កាបូរ៉ូ សូល (Scarborough Shoal) នៅក្នុងឧបទ្ទវត្តិហេតុដំបូងចាប់តាំងពីលោក Marcos ចូលកាន់តំណែងក្នុងឆ្នាំ ២០២២ ដែលហ្វីលីពីនបានត្អូញត្អែរពីសកម្មភាពគ្រោះថ្នាក់ដោយយន្តហោះរបស់ចិន។

យោធាហ្វីលីពីនកាលពីថ្ងៃសៅរ៍បានរិះគន់សកម្មភាពដ៏គ្រោះថ្នាក់ និងបង្កហេតុ នៅពេលយន្តហោះចិនពីរគ្រឿងបានទម្លាក់អណ្តាតភ្លើងនៅក្នុងផ្លូវរបស់យន្តហោះហ្វីលីពីន អំឡុងពេលល្បាតជាប្រចាំនៅជុំវិញតំបន់មានជម្លោះកាលពីថ្ងៃព្រហស្បតិ៍។

ទីបញ្ជាការភូមិខាងត្បូងរបស់យោធាចិន និយាយថាហ្វីលីពីនបានបង្អាក់ការហ្វឹកហ្វឺនរបស់ខ្លួនដោយចោទប្រកាន់ទីក្រុងម៉ានីលថា បានបំពានដោយខុសច្បាប់ចូលក្នុងដែនអាកាសរបស់ខ្លួន។

កាលពីថ្ងៃអាទិត្យ លោក Marcos បានជំរុញឲ្យប្រទេសចិនធ្វើការប្រកបដោយការទទួលខុសត្រូវទាំងក្នុងសមុទ្រ និងលើអាកាស។ 

ស្ថានទូតចិនប្រចាំនៅទីក្រុងម៉ានីល ពុំបានឆ្លើយតបភ្លាមៗចំពោះសំណើសុំការអត្ថាធិប្បាយទេកាលពីថ្ងៃអាទិត្យ៕