មន្ទីរបញ្ចកោណបាននិយាយកាលពីថ្ងៃអាទិត្យ (១១ សីហា) ថា រដ្ឋមន្ត្រីក្រសួងការពារជាតិអាមេរិក លោក ឡយដ៍ អស្ទីន (Lloyd Austin) បានបញ្ជាឱ្យដាក់ពង្រាយនាវាមុជទឹកមីស៊ីលប្រព័ន្ធទូរបញ្ជាទៅកាន់មជ្ឈិមបូព៌ា ខណៈតំបន់នេះត្រៀមខ្លួនសម្រាប់ការវាយប្រហារដែលអាចកើតមានដោយអ៊ីរ៉ង់ និងសម្ព័ន្ធមិត្ត បន្ទាប់ពីការសម្លាប់សមាជិកជាន់ខ្ពស់នៃក្រុមហាម៉ាស និងហេសបូឡា។

ខណៈពេលដែលនាវាមុជទឹកដើរដោយថាមពលនុយក្លេអ៊ែរ យូអេសអេស ចចា (USS Georgia) បានស្ថិតនៅក្នុងសមុទ្រមេឌីទែរ៉ាណេរួចទៅហើយកាលពីខែកក្កដា យោងតាមការបង្ហោះរបស់យោធាអាមេរិកនៅលើប្រព័ន្ធផ្សព្វផ្សាយសង្គម នេះគឺជាសកម្មភាពដ៏កម្រមួយក្នុងការប្រកាសជាសាធារណៈអំពីការដាក់ពង្រាយនាវាមុជទឹកបែបនេះ។

នៅក្នុងសេចក្តីថ្លែងការណ៍មួយបន្ទាប់ពីលោក Austin បាននិយាយជាមួយសមភាគីអ៊ីស្រាអែល មន្ទីរបញ្ចកោណបាននិយាយថា លោក Austin បានបញ្ជាឱ្យក្រុមវាយប្រហារ អាប្រាហាម លីនខុន (Abraham Lincoln) ពន្លឿនការដាក់ពង្រាយរបស់ខ្លួនទៅកាន់តំបន់។

យោធាអាមេរិកបាននិយាយរួចហើយថា ខ្លួននឹងដាក់ពង្រាយយន្តហោះចម្បាំង និងនាវាចម្បាំងរបស់កងទ័ពជើងទឹកបន្ថែមទៀតទៅកាន់មជ្ឈិមបូព៌ា ខណៈទីក្រុងវ៉ាស៊ីនតោន ព្យាយាមពង្រឹងការការពារអ៊ីស្រាអែល។

ការធ្វើឃាតលោក អ៊ីស្មេល ហានីយេ (Ismail Haniyeh) មេដឹកនាំក្រុមហាម៉ាសគាំទ្រដោយអ៊ីរ៉ង់ នៅរដ្ឋធានីតេអេរ៉ង់ ដែលត្រូវបានស្តីបន្ទោសលើអ៊ីស្រាអែល ហើយការសម្លាប់មេបញ្ជាការយោធាជាន់ខ្ពស់នៃក្រុមហេសបូឡា ដែលគាំទ្រដោយអ៊ីរ៉ង់ ក្នុងការវាយប្រហារលើក្រុងបេរូត ដោយអ៊ីស្រាអែលដោយឡែកមួយទៀតនោះ បានជំរុញឱ្យមានការព្រួយបារម្ភថាជម្លោះនៅតំបន់ហ្កាហ្សា កំពុងក្លាយជាសង្រ្គាមមជ្ឈិមបូព៌ាកាន់តែធំ៕