តុលាការកំពូលរបស់ទីក្រុងហុងកុង នៅថ្ងៃចន្ទ (១២ សីហា) នេះបានច្រានចោលជាឯកច្ឆ័ន្ទលើសំណើសុំឱ្យលុបចោលសាលក្រមមានទោសរបស់មហាសេដ្ឋីប្រព័ន្ធផ្សព្វផ្សាយ លោក ជីមមី ឡៃ (Jimmy Lai) និងអ្នកធ្វើយុទ្ធនាការគាំទ្រលទ្ធិប្រជាធិបតេយ្យចំនួនប្រាំមួយនាក់ផ្សេងទៀត សម្រាប់ការជួបប្រជុំដោយគ្មានការអនុញ្ញាតក្នុងឆ្នាំ២០១៩។

លោក Lai វ័យ ៧៦ឆ្នាំ ស្ថាបនិកប្រព័ន្ធផ្សព្វផ្សាយ អេបផល ដេលី (Apple Daily) និងមនុស្ស ៦នាក់ផ្សេងទៀតរួមទាំងអ្នកប្រជាធិបតេយ្យជើងចាស់ លោក ម៉ាទីន លី (Martin Lee) ត្រូវបានគេរកឃើញថាមានទោសពីបទរៀបចំ និងចូលរួមក្នុងការជួបជុំដែលគ្មានការអនុញ្ញាតក្នុងខែសីហា ឆ្នាំ២០១៩ ក្នុងអំឡុងពេលបាតុកម្មគាំទ្រលទ្ធិប្រជាធិបតេយ្យរយៈពេលជាច្រើនខែនៅក្នុងទីក្រុងដែលគ្រប់គ្រងដោយប្រទេសចិនមួយនេះ។

ខណៈដែលតុលាការជាន់ទាបបានលុបចោលសាលក្រមមានទោសពួកគេចំពោះការរៀបចំការជួបជុំដែលគ្មានការអនុញ្ញាតនោះ ប៉ុន្តែការផ្តន្ទាទោសពួកគេចំពោះការចូលរួមក្នុងព្រឹត្តិការណ៍នោះនៅតែត្រូវបានរក្សាទុក។ បណ្ដឹងឧទ្ធរណ៍របស់អ្នកមានទោសទាំងនោះដាក់ទៅលើថា តើការកាត់ទោសនេះសមាមាត្រទៅនឹងការការពារសិទ្ធិមនុស្សជាមូលដ្ឋាន ឬយ៉ាងណា ដែលជាគោលការណ៍មួយកំណត់នៅក្នុងសេចក្តីសម្រេចមិនជាប់ចំណងផ្លូវច្បាប់ចំនួនពីររបស់តុលាការកំពូលរបស់ចក្រភពអង់គ្លេស។

លោក Lai ត្រូវបានជាប់ឃុំឃាំងអស់រយៈពេលជាង ៣ឆ្នាំចាប់តាំងពីខែធ្នូ ឆ្នាំ២០២០មក។ ឥឡូវនេះលោកកំពុងប្រឈមមុខនឹងការកាត់ទោសផ្នែកសន្តិសុខជាតិដាច់ដោយឡែកពីគ្នា ហើយត្រូវបានកាត់ទោសឱ្យជាប់ពន្ធនាគាររយៈពេល ៥ឆ្នាំ ៩ខែ បន្ទាប់ពីត្រូវបានកាត់ទោសពីបទបំពានកិច្ចសន្យាជួលសម្រាប់ទីស្នាក់ការព័ត៌មានរបស់លោក ដែលត្រូវបានបិទទ្វា៕