អាជ្ញាធរបាននិយាយនៅថ្ងៃចន្ទ (១២ សីហា) នេះថា ឧទ្ធម្ភាគចក្រមួយគ្រឿងបានធ្លាក់ទៅលើដំបូលសណ្ឋាគារមួយក្នុងទីក្រុងទេសចរណ៍ដ៏ពេញនិយមភាគខាងជើងប្រទេសអូស្ត្រាលី នៅទីក្រុង ឃែនស៍ (Cairns) ដោយបានសម្លាប់អ្នកបើកយន្តហោះ (ពីឡុត) និងបង្ខំឱ្យមានការជម្លៀសភ្ញៀវរាប់រយនាក់ចេញពីសណ្ឋាគារ។

នគរបាលរដ្ឋ ឃ្វីនស៍លែន (Queensland) បាននិយាយនៅក្នុងសេចក្តីថ្លែងការណ៍មួយថា ក្រុមសង្គ្រោះបន្ទាន់ត្រូវបានគេជូនដំណឹងនៅម៉ោងប្រហែល ២ទៀបភ្លឺថ្ងៃចន្ទ បន្ទាប់ពីឧទ្ធម្ភាគចក្រម៉ាស៊ីនភ្លោះបានបុកជាមួយដំបូលសណ្ឋាគារ បណ្តាលឱ្យមានភ្លើងឆេះនៅលើដំបូលអគារ និងបង្កឱ្យមានការជម្លៀសចេញ។

នគរបាលបាននិយាយថា ការស៊ើបអង្កេតធ្វើកោសល្យវិច្ច័យកំពុងដំណើរការដើម្បីកំណត់អត្តសញ្ញាណអ្នកបើកយន្តហោះជាផ្លូវការ។ អាជ្ញាធរបន្ថែមថា អ្នកបើកឧទ្ធម្ភាគចក្រតែម្នាក់គត់នោះបានស្លាប់នៅកន្លែងកើតហេតុ ហើយភ្ញៀវសណ្ឋាគារពីរនាក់ ដែលជាបុរសវ័យ ៨០ឆ្នាំ និងស្ត្រីវ័យ ៧០ឆ្នាំ ត្រូវបានបញ្ជូនទៅមន្ទីរពេទ្យក្នុងស្ថានភាពនឹងនរ។

ប្រព័ន្ធផ្សព្វផ្សាយអូស្ត្រាលីបានរាយការណ៍ថា ឧបទ្ទវហេតុធ្លាក់នេះបានកើតឡើងនៅសណ្ឋាគារ ហ៊ីលតុនស៍ ដាប់ប៊ល ទ្រី (Hilton's Double Tree) ក្នុងទីក្រុង Cairns ដែលជាច្រកទ្វារដ៏សំខាន់ទៅកាន់តំបន់ថ្មប៉ប្រះទឹក ហ្រ្គេត បារៀ រីហ្វ (Great Barrier Reef) ដ៏ពេញនិយមរបស់អូស្ត្រាលី នៅម៉ោងប្រហែល ១:៥០នាទីព្រឹកព្រលឹម (ម៉ោងក្នុងស្រុក) នៅថ្ងៃចន្ទ។ របាយការណ៍ប្រព័ន្ធផ្សព្វផ្សាយបាននិយាយថា ស្លាបចក្រចំនួនពីររបស់ឧទ្ធម្ភាគចក្របានដាច់ចេញ និងមួយបានធ្លាក់នៅក្នុងអាងទឹករបស់សណ្ឋាគារ៕