ប្រធានាធិបតីជាប់ឆ្នោត លោក ផូល ខាហ្គាម៉េ(Paul Kagame) កាលពីថ្ងៃអាទិត្យ បានស្បថចូលកាន់តំណែងជាប្រធានាធិបតីរបស់ប្រទេសរ៉្វាន់ដា សម្រាប់អាណត្តិទីបួនរបស់លោក នៅក្នុងពិធីមួយដែលត្រូវបានធ្វើឡើងនៅពហុកីឡដ្ឋាន Amahoro ក្នុងរដ្ឋធានី Kigali។ ពិធីស្បថចូលកាន់តំណែង ត្រូវបានគ្រប់គ្រងដោយប្រធានតុលាការ និងមានការចូលរួមពីប្រជាជនរ៉្វាន់ដារាប់ពាន់នាក់ ព្រមទាំងប្រមុខរដ្ឋ និងរដ្ឋាភិបាល មកពីបណ្តាប្រទេសជាច្រើន។

ព្រឹត្តិការណ៍នេះ ក៏មានការចូលរួមពីសំណាក់ប្រធានអង្គការអន្តរជាតិ និងតំបន់ រួមជាមួយមន្ត្រីរដ្ឋាភិបាលជាន់ខ្ពស់រាប់សិបនាក់មកពីទូទាំងទ្វីបអាហ្រ្វិក។

នៅក្នុងសុន្ទរកថាចូលកាន់តំណែង លោក Kagame បានចាត់ទុកពិធីនេះថាជាថ្ងៃនៃការបន្តឡើងវិញ និងបានអរគុណដល់អ្នកគាំទ្រ។ លោក Kagame និយាយថា លោកអាចចាប់ផ្តើមដោយអរគុណដល់ប្រជាជនរ៉្វាន់ដាទាំងអស់ សម្រាប់ការជឿទុកចិត្ត និងផ្តល់ទំនុកចិត្តមកលើលោក។ វាជាកិត្តិយសណាស់ ក្នុងការធ្វើជាប្រធានាធិបតីរបស់អ្នក សម្រាប់មួយអាណត្តិទៀត។

ដោយឆ្លុះបញ្ចាំងពីវឌ្ឍនភាពរបស់ប្រទេសរ៉្វាន់ដា ក្នុងរយៈពេលបីទសវត្សរ៍កន្លងទៅនេះ លោក Kagame បាននិយាយថា សមិទ្ធិផលទទួលបានលើសពីការរំពឹងទុក។ ជាការពិតណាស់ វាហួសពីអ្វីដែលអាចពណ៌នាបាន។ លោក Kagame បានបញ្ជាក់ថា ការផ្តោតការយកចិត្តទុកដាក់នៅពេលនេះ ផ្លាស់ប្តូរទៅអនាគត ដោយលោកនិយាយថា៣០ឆ្នាំកន្លងទៅ គឺជាការងារដែលកំពុងដំណើរការ។ លោកបានចាត់ទុកអាណត្តិថ្មីថាជាការចាប់ផ្តើមនៃការខិតខំកាន់តែខ្លាំង។

ប្រជាជនរ៉្វាន់ដា ប្រហែល៩លាននាក់ បានបោះឆ្នោតរបស់ពួកគេនៅក្នុងការបោះឆ្នោតប្រធានាធិបតីដែលបានធ្វើឡើងកាលពីថ្ងៃទី១៥ ខែកក្កដា។ លោក Kagame តំណាងឱ្យគណបក្សរណសិរ្យសេ្នហាជាតិរ៉្វាន់ដា (RPF) ដែលកំពុងកាន់អំណាច បានទទួលជ័យជម្នះក្នុងការបោះឆ្នោត ក្នុងសំឡេង ៩៩,១៨ ភាគរយនៃការបោះឆ្នោត នេះបើយោងតាមលទ្ធផលចុងក្រោយដែលបានចេញផ្សាយ កាលពីចុងខែមុន ដោយ គណៈកម្មាធិការជាតិរៀបចំការបោះឆ្នោត។