ក្រុមឃ្លាំមើលសង្គ្រាម បានរាយការណ៍ថា ការផ្ទុះជាបន្តបន្ទាប់ បានធ្វើឲ្យកក្រើកតំបន់មួយ នៅជិតតំបន់ខ្ពង់រាប ( Golan Heights) កាន់កាប់ដោយអ៊ីស្រាអែលកាលពីថ្ងៃអាទិត្យ ខណៈដែលកងកម្លាំងអ៊ីស្រាអែល បានកំណត់គោលដៅលើទីតាំងយោធាស៊ីរីដោយគ្រាប់រ៉ុក្កែត នៅក្នុងតំបន់ Tel Al-Jabiya នៃខេត្ត Daraa ភាគខាងត្បូង។

ផ្សែងហុយចេញពីកន្លែងកើតហេតុ ហើយរថយន្តសង្គ្រោះបន្ទាន់ ត្រូវបានបញ្ជូនទៅកន្លែងកើត ហេតុ។ នេះបើតាមក្រុមឃ្លាំមើលសិទ្ធិមនុស្សស៊ីរី ។

ក្រុមឃ្លាំមើលដែលមានមូលដ្ឋាននៅចក្រភពអង់គ្លេស បានរាយការណ៍ថា ទីតាំងនោះ ជាកម្មសិទ្ធិរបស់កងកម្លាំងរដ្ឋាភិបាលស៊ីរី ដោយមិនផ្តល់ព័ត៌មានលម្អិតបន្ថែម។

ការវាយប្រហារនេះ គឺជាផ្នែកមួយនៃការវាយប្រហារជាបន្តបន្ទាប់របស់អ៊ីស្រាអែល ទៅលើទឹកដីស៊ីរី។

យោងតាមក្រុមសង្កេតការណ៍នេះ អ៊ីស្រាអែល បានបើកការវាយប្រហារចំនួន ៥៩លើក លើទឹកដីស៊ីរី ចាប់តាំងពីដើមឆ្នាំនេះ ដែលក្នុងនោះ ៤២លើក គឺជាការវាយប្រហារតាមអាកាស និង ការវាយប្រហារតាមជើងគោក ១៧លើក។ ការវាយប្រហារទាំងនោះ បានកំណត់គោលដៅ និងបំផ្លាញទីតាំងចំនួន ១២២កន្លែង រួមទាំងឃ្លាំងអាវុធ ទីបញ្ជាការយោធា និងយានយន្តជាច្រើនគ្រឿង។

ក្រុមសង្កេតការណ៍ បានកត់ត្រាការស្លាប់របស់បុគ្គលិកយោធា ១៧៨នាក់ និង ១០៣ នាក់ផ្សេងទៀត បានរងរបួស ដោយសារការវាយប្រហារទាំងនេះ។

បន្ថែមពីលើនេះ ជនស៊ីវិល១៧នាក់ ត្រូវបានសម្លាប់នៅក្នុងការវាយប្រហារទាំងនេះ។ នេះបើយោងតាមក្រុមសង្កេតការណ៍។ អ៊ីស្រាអែល មិនបានធ្វើអត្ថាធិប្បាយលើការវាយប្រហារថ្មីៗរបស់ខ្លួន នៅស៊ីរីទេ។