មេដឹកនាំប្រទេសបង់ក្លាដែស លោក Muhammad Yunus ត្រូវបានលើកលែងទោស នៅក្នុងសំណុំរឿងពុករលួយ ដែលត្រូវបានប្ដឹងដោយគណៈកម្មាធិការប្រឆាំងអំពើពុករលួយរបស់ប្រទេសនេះ ដោយការសម្រេចនេះ កើតមានឡើងត្រឹមតែប៉ុន្មានថ្ងៃបន្ទាប់ពីរូបលោកបានស្បថចូលកាន់តំណែងជារដ្ឋាភិបាលបណ្តោះអាសន្នបន្ទាប់ពីនាយករដ្ឋមន្ត្រី លោកស្រី Sheikh Hasina ធ្លាក់ចេញពីតំណែង។

សេចក្ដីរាយការណ៍ពីសារព័ត៌មាន The Daily Star កាលពីថ្ងៃអាទិត្យ (ទី១១ ខែសីហា) ដោយដកស្រង់សម្តីមន្ត្រីម្នាក់ នៅគណៈកម្មការប្រឆាំងអំពើពុករលួយ បានឲ្យដឹងថា តុលាការពិសេស នៅទីក្រុងដាកា បានសម្រេចដោះលែងអ្នកសេដ្ឋកិច្ច និងម្ចាស់ពានរង្វាន់ណូបែលសន្តិភាពរូបនេះ រួមជាមួយនឹងមនុស្ស ១៣នាក់ផ្សេងទៀត។ ប្រសិនបើលោកបណ្ឌិត Yunus ត្រូវបានរកឃើញថា មានទោសពីបទសម្អាតលុយកខ្វក់ នៅក្នុងករណីនោះ លោកនឹងប្រឈមជាមួយហានិភ័យនៃការជាប់ពន្ធនាគារអស់មួយជីវិត។ 

ជាមួយគ្នានេះ មួយថ្ងៃនៅមុនពេលលោកស្បថចូលកាន់តំណែងជាប្រមុខទីប្រឹក្សារដ្ឋាភិបាលបណ្តោះអាសន្ន ដែលមានអំណាចជានាយករដ្ឋមន្ត្រី លោកបណ្ឌិត Yunus ត្រូវបានរួចទោសក្នុងសំណុំរឿងរំលោភលើការងារ ដែលលោកត្រូវបានកាត់ទោសឲ្យជាប់ពន្ធនាគាររយៈពេល ៦ខែ។ មេធាវីសិទ្ធិមនុស្សបានពណ៌នាករណីទាំង ២នេះថា ជារឿងនយោបាយ។ មេធាវីរបស់លោកបណ្ឌិត Yunus មិនបានឆ្លើយនឹងការហៅទូរសព្ទពីសារព័ត៌មាន Bloomberg News នោះទេ។

គួរបញ្ជាក់ថា បន្ទាប់ពីលោកស្រី Hasina វ័យ ៧៦ឆ្នាំ បានភៀសខ្លួនចេញពីប្រទេស កាលពីសប្តាហ៍មុន បន្ទាប់ពីមានការបះបោរដឹកនាំដោយនិស្សិត ការផ្ដោតរបស់អ្នកតវ៉ា បានបង្វែរទិសដៅទៅរកអ្នកស្មោះត្រង់ជាមួយលោកស្រី នៅក្នុងប្រព័ន្ធតុលាការ និងធនាគារកណ្តាល។ ប្រធានចៅក្រម លោក Obaidul Hassan បានលាលែងពីតំណែង ដោយសារក្រុមអ្នកតវ៉ាបានអំពាវនាវឲ្យចៅក្រមទាំងអស់ចុះចេញពីតំណែង ខណៈដែលអភិបាលធនាគារបង់ក្លាដែស លោក Abdur Rouf Talukder បានព្រមដើរចេញពីតួនាទីរបស់ខ្លួន។

យ៉ាងណាក្ដី លោកបណ្ឌិត Yunus ដែលបានត្រួសត្រាយបង្កើតមីក្រូហិរញ្ញវត្ថុ មិនធ្លាប់មានបទពិសោធន៍ក្នុងនាមជាអ្នកគ្រប់គ្រងនយោបាយនោះទេ ដោយវាបន្ថែមភាពមិនច្បាស់លាស់ថា តើរូបលោកនឹងអនុវត្តការកសាងប្រទេសដែលមានប្រជាជនជាង ១៧០លាននាក់ឡើងវិញបានដោយរបៀបណា៕