​បាល់ទាត់៖ ​ក្លិប Nice ត្រូវបាន​សំរេច​កាត់​ពិន្ទុ​ចំនួន ២​ពិន្ទុ​បន្ទាប់ពី​ការរំខាន​ដោយ​អ្នកគាំទ្រ​លើក​មុន​អំឡុង​ការប្រកួត​រវាង Nice និង Marseille កាលពី​ថ្ងៃទី​២២ ខែសីហា​។ ​ក្រុមបាល់ទាត់ Nice ត្រូវបាន​សំរេច​ឱ្យ​ឈ្នះ Olympique Marseille ៣-០ បន្ទាប់ពី​ការប្រកួត​ដ៏​ច្របូកច្របល់​មានការ​រំខាន​ពី​អ្នកគាំទ្រ​។​

​​Nice បាន​នាំ​មុខមុន ១-០ ដោយ​គ្រាប់​បាល់​របស់ Kasper Dolberg តែ​ក្រោយមក​ការប្រកួត​ក៏ត្រូវ​បាន​ផ្អាក​ដោយសារ​អ្នកគាំទ្រ Nice រត់​ចូលមកក្នុង​ទីលាន​។​ ​ក្រុម​អ្នកគាំទ្រ​នៅ​ខាងក្រោយ​សំណាញ់​ទី​បាន​ចោល​ដប​ទឹក និង​វត្ថុ​រឹង​ផ្សេងៗ​មកលើ​កីឡាករ​របស់ Marseille, Dimitry Payet ហើយ Payet ខឹង​ក៏​រើស​ដប​នោះ​គប់​ទៅ​អ្នកគាំទ្រ​វិញ ដែល​ធ្វើឱ្យ​កំហឹង​របស់​អ្នកគាំទ្រ Nice កាន់តែខ្លាំង និង​រត់​ចូល​ទីលានរហូតដល់​ការប្រកួត​ត្រូវបាន​សំរេច​ផ្អាក​តែម្តង​។​ ​ក្រៅពីនោះ Nice ក៏ត្រូវ​រង​ពិន័យ​ប្រកួត ៣ប្រកួត​មិនឱ្យ​អ្នកគាំទ្រ​ចូល​ទស្សនា​។

​​Dimitry Payet ត្រូវ​ពិន័យ​មិនឱ្យ​ប្រកួត ១ប្រកួត​ផងដែរ ហើយ​កីឡាករ​បារាំង​មួយរូប​ទៀត Alvaro Gonzalez ត្រូវ​ពិន័យ ២​ប្រកួត​។​ ​មិនមែនជា​លើកដំបូង​ទេ​ក្នុង​រដូវ​កាល​នេះ កាលពី ២សប្តាហ៍​មុន​ជំនួប​ដែល Marseille យកឈ្នះ Montpellier ៣-២ ក៏មាន​ការរំខាន​ពី​អ្នកគាំទ្រ​រត់​ចូល​ទីលាន និង​ចោល​ដប​ទឹក​លើ​កីឡាករ​បែបនេះ​ដូចគ្នា​៕

​អត្ថបទ​៖​នាង សុភា​វុ​ធ