ប្រធានាធិបតីអ៊ីរ៉ង់ លោក Masoud Pezeshkian និងលោក Charles Michel ប្រធានក្រុមប្រឹក្សាអឺរ៉ុប កាលពីថ្ងៃអាទិត្យ បានផ្លាស់ប្តូរទស្សនៈស្តីពីការបន្តកិច្ចចរចាស្តីពីការស្តារឡើងវិញនូវកិច្ចព្រមព្រៀងនុយក្លេអ៊ែរឆ្នាំ ២០១៥ ។

នៅក្នុងការសន្ទនាតាមទូរស័ព្ទ ភាគីទាំងពីរ បានពិភាក្សាអំពីទំនាក់ទំនងទ្វេភាគី ក៏ដូចជាបញ្ហាក្នុងតំបន់ និងអន្តរជាតិ ដែលមានផលប្រយោជន៍រួម រួមទាំងការលើកកម្ពស់ពហុភាគីនិយម ក្នុងពិភពលោក និងការអធីវិឌ្ឍនៅក្នុងតំបន់ហ្កាហ្សា។ នេះបើយោងតាមសេចក្តីថ្លែងការណ៍ដែលបានចេញផ្សាយនៅលើគេហទំព័ររបស់ការិយាល័យប្រធានាធិបតីអ៊ីរ៉ង់។

ពាក់ព័ន្ធនឹងការបន្តកិច្ចចរចានុយក្លេអ៊ែររវាងអ៊ីរ៉ង់ និងភាគីផ្សេងទៀតនៃកិច្ចព្រមព្រៀងនេះ លោក Pezeshkian បាននិយាយថា ការបន្តនៃការជឿទុកចិត្ត និងការការពារផលប្រយោជន៍ទ្វេភាគី គឺជាមូលដ្ឋានសម្រាប់កិច្ចព្រមព្រៀងមួយ។

លោកបានបន្ថែមថា ប្រសិនបើភាគីទាំងពីរ បំពេញការកាតព្វកិច្ចរបស់ពួកគេ និងជួយកសាងទំនុកចិត្តគ្នាទៅវិញទៅមក បន្ថែមពីលើការស្តារឡើងវិញនូវកិច្ចព្រមព្រៀងនុយក្លេអ៊ែរ បញ្ហាទ្វេភាគីផ្សេងទៀត អាចត្រូវបានពិភាក្សា។