មេដឹកនាំនៃប្រទេសបារាំង អាល្លឺម៉ង់ និងអង់គ្លេស នៅថ្ងៃចន្ទ (ទី១២ ខែសីហា) បានលើកឡើងរួមគ្នាថា «មិនអាចមានការពន្យារពេលទៀតបាននោះទេ» ក្នុងការចរចាឲ្យមានបទឈប់បាញ់ នៅតំបន់ហ្កាហ្សា ហើយបានព្រមានអ៊ីរ៉ង់ និងសម្ព័ន្ធមិត្តរបស់ប្រទេសនេះថា កុំ «ធ្វើឲ្យជម្លោះកើនឡើងបន្ថែមទៀត»។

សេចក្តីថ្លែងការណ៍រួម បានកើតឡើងបន្ទាប់ពីមានការវាយប្រហារមួយ ក្នុងចំណោមការវាយប្រហាររបស់អ៊ីស្រាអែល ដែលបណ្ដាលឲ្យមនុស្សស្លាប់ច្រើនបំផុត នៅតំបន់ហ្កាហ្សាស្ទ្រីប ដែលត្រូវបានឡោមព័ទ្ធអស់រយៈពេលជាង ១០ខែមកហើយ គិតចាប់តាំងពីសង្រ្គាមផ្ទុះឡើង។

គួរបញ្ជាក់ថា នៅតំបន់ហ្កាហ្សាភាគខាងជើង ការវាយប្រហារតាមអាកាសរបស់អ៊ីស្រាអែល កាលពីថ្ងៃទី៩ ខែសីហា បានសម្លាប់មនុស្សយ៉ាងហោចណាស់ ៩៣នាក់ នៅឯសាលាសាសនាមួយ ដែលកំពុងក្លាយជាទីជម្រករបស់ពលរដ្ឋភៀសខ្លួនប៉ាឡេស្ទីន។ នេះបើយោងតាមការឲ្យដឹងរបស់ក្រុមអ្នកជួយសង្គ្រោះការពារជនស៊ីវិល។

ប្រធានាធិបតីបារាំង លោក Emmanuel Macron អធិការបតីអាល្លឺម៉ង់ លោក Olaf Scholz និងនាយករដ្ឋមន្ត្រីអង់គ្លេស លោក Keir Starmer បានលើកឡើងនៅក្នុងសេចក្តីថ្លែងការណ៍រួមថា៖ «ការប្រយុទ្ធត្រូវតែបញ្ចប់នៅពេលនេះ ហើយចំណាប់ខ្មាំងទាំងអស់ដែលនៅតែត្រូវបានចាប់ខ្លួនដោយក្រុមហាម៉ាស ត្រូវតែត្រូវបានដោះលែង។ ប្រជាជននៅតំបន់ហ្កាហ្សា ត្រូវការសម្ភារផ្គត់ផ្គង់ និងការចែកចាយជំនួយជាបន្ទាន់ និងមិនមានការរំខាន។ មិនអាចមានការពន្យារពេលបន្ថែមទៀតនោះទេ»។

ជាមួយគ្នានេះ មេដឹកនាំទាំង៣ ក៏បានស្វាគមន៍ ចំពោះការធ្វើការងារ «មិនចេះនឿយហត់» របស់អ្នកសម្រុះសម្រួលអេហ្ស៊ីប កាតា និងសហរដ្ឋអាមេរិក ក្នុងដំណើរឆ្ពោះទៅរកកិច្ចព្រមព្រៀង ស្តីពីបទឈប់បាញ់ និងការដោះលែងចំណាប់ថ្នូរ។

សូមបញ្ជាក់ថា ការចរចាជាច្រើនជុំ ដើម្បីឲ្យមានបទឈប់បាញ់ នៅហ្កាហ្សា បានបរាជ័យម្ដងហើយម្ដងទៀត លើកលែងតែបទឈប់បាញ់រយៈពេលមួយសប្តាហ៍ដែលត្រូវបានឃើញនៅចុងខែវិច្ឆិកាប៉ុណ្ណោះ៕