ប្រទេសចិន នៅថ្ងៃចន្ទ (ទី១២ ខែសីហា) បានជំរុញឲ្យភាគីទាំងអស់ ក្នុងសង្គ្រាមអ៊ុយក្រែន បន្ថយភាពតានតឹង ខណៈកងកម្លាំងរបស់ក្រុងគីវ បានរុលចូលយ៉ាងជ្រៅទៅក្នុងតំបន់ព្រំដែនរបស់តំបន់ Kursk របស់រុស្ស៊ី ដែលជាសម្ព័ន្ធមិត្តរបស់ក្រុងប៉េកាំង។

មន្ត្រីសន្តិសុខអ៊ុយក្រែនម្នាក់ បានប្រាប់សារព័ត៌មាន AFP ថា ទីក្រុងគីវ បានដាក់ពង្រាយទាហានរាប់ពាន់នាក់ សម្រាប់ប្រតិបត្តិការដ៏គួរឲ្យភ្ញាក់ផ្អើលនេះ ដោយនាំមុខនៅសមរភូមិ បន្ទាប់ពីមានការរុលទៅមុខយឺតៗជាច្រើនខែរបស់រុស្ស៊ី នៅទូទាំងភាគខាងកើត ។

ការវាយលុកហាក់ដូចជាធ្វើឲ្យវិមានក្រឹមឡាំងភ្ញាក់ផ្អើល ដោយកងទ័ពរបស់ក្រុងម៉ូស្គូ កាលពីថ្ងៃអាទិត្យ (ទី១១ ខែសីហា) ទំនងជាទទួលស្គាល់ថា អ៊ុយក្រែនអាចវាយលុកចូលដែនដីខ្លួនបានចម្ងាយដល់ទៅ ៣០គីឡូម៉ែត្រ នៅតំបន់ជាក់លាក់មួយចំនួន។

ជាការឆ្លើយតបទៅនឹងការវាយលុកនេះ ទីក្រុងប៉េកាំង នៅថ្ងៃទី១២ ខែសីហា បានជំរុញឲ្យភាគីទាំងអស់អនុវត្តតាម «គោលការណ៍ ៣ ដើម្បីបន្ធូរបន្ថយស្ថានការណ៍»។ អ្នកនាំពាក្យក្រសួងការបរទេស បានឲ្យដឹងនៅក្នុងសេចក្តីថ្លែងការណ៍មួយថា៖ «សូមកុំពង្រីកសមរភូមិ កុំបង្កើនការប្រយុទ្ធ និងកុំដុតភ្លើងបន្ថែមទៀតពីភាគីណាមួយ»។

អ្នកនាំពាក្យរូបនេះបានបន្ថែមថា៖ «ប្រទេសចិននឹងបន្តរក្សាទំនាក់ទំនងជាមួយសហគមន៍អន្តរជាតិ និងដើរតួនាទីស្ថាបនា ដើម្បីជំរុញដល់ដំណោះស្រាយនយោបាយ ចំពោះវិបត្តិនេះ»។

គួរបញ្ជាក់ថា ប្រទេសចិនបង្ហាញថា ខ្លួនជាភាគីអព្យាក្រឹតក្នុងសង្គ្រាមនេះ ហើយនិយាយថា ខ្លួនមិនបញ្ជូនជំនួយបង្កគ្រោះថ្នាក់ទៅភាគីណាមួយទេ ពោលគឺមិនដូចសហរដ្ឋអាមេរិក និងប្រទេសលោកខាងលិចផ្សេងទៀតនោះឡើយ៕