ក្រុមគ្រូពេទ្យ នៅតំបន់ជាច្រើននៃប្រទេសឥណ្ឌា នាថ្ងៃចន្ទ (ទី១២ ខែសីហា) នេះ បាននាំគ្នាធ្វើបាតុកម្មទាមទារយុត្តិធម៌ បន្ទាប់ពីគ្រូពេទ្យហាត់ការ នៅរដ្ឋ West Bengal ភាគខាងកើត ត្រូវបានរំលោភ និងសម្លាប់ នៅក្នុងបរិវេណមន្ទីរពេទ្យគ្រប់គ្រងដោយរដ្ឋ។

ប្រព័ន្ធផ្សព្វផ្សាយក្នុងស្រុក បានរាយការណ៍ថា មន្ត្រីនគរបាលបានរកឃើញសពជនរងគ្រោះ នៅក្នុងសាលសិក្ខាសាលារបស់មហាវិទ្យាល័យវេជ្ជសាស្ត្រ R.G. Kar កាលព្រឹកថ្ងៃសុក្រ (ទី៩ ខែសីហា) បន្ទាប់ពីនាងត្រូវបានគេរំលោភផ្លូវភេទ និងសម្លាប់ កាលពីយប់ថ្ងៃព្រហស្បតិ៍ (ទី៨ ខែសីហា) នៅក្នុងរដ្ឋធានី Kolkata របស់រដ្ឋ West Bengal ។

ក្រុមគ្រូពេទ្យដែលពេញទៅដោយក្ដីក្រេវក្រោធ នៅទីក្រុង Kolkata, New Delhi, Chandigarh និងទីក្រុង Lucknow ភាគខាងជើង បានប្រមូលផ្តុំគ្នា និងលើកបដាតវ៉ា ដោយទាមទារឲ្យមានការអន្តរាគមន៍ពីការិយាល័យស៊ើបអង្កេតសហព័ន្ធរបស់ប្រទេស ក្នុងសំណុំរឿងនេះ។

គេឃើញក្រុមអ្នកតវ៉ាកាន់បដាដែលសរសេរថា «គ្មានសុវត្ថិភាព គ្មានការបំពេញភារកិច្ច» និងពាក្យថា «Save the Saviurs» (សូមការពារអ្នកជួយសង្គ្រោះគេ) ខណៈដែលពួកគេបានអំពាវនាវឲ្យមានការកែលម្អការការពារ និងបង្កើនកន្លែងសុវត្ថិភាព សម្រាប់ក្រុមគ្រូពេទ្យ។

រដ្ឋមន្ត្រីប្រចាំរដ្ឋ លោកស្រី Mamata Banerjee បាននិយាយថា នាយកមហាវិទ្យាល័យវេជ្ជសាស្ត្រ បានលាលែងពីតំណែងហើយ ហើយប្រសិនបើរដ្ឋមិនអាចចាប់ខ្លួនបុគ្គលជាប់ចោទឲ្យបានត្រឹមថ្ងៃអាទិត្យ (ទី១៨ ខែសីហា) ទេនោះ ករណីនេះនឹងត្រូវបញ្ជូនទៅការិយាល័យស៊ើបអង្កេតកណ្តាល៕