យ៉ាងហោចណាស់ក៏មានអ្នកស្លាប់ ៧នាក់ និងអ្នករងរបួសជាង ១០នាក់ នាថ្ងៃចន្ទ (ទី១២ ខែសីហា) នេះ នៅក្នុងហេតុការណ៍ប្រជ្រៀតជាន់គ្នា ក្នុងអំឡុងពេលដង្ហែក្បួនរបស់អ្នកកាន់សាសនាហិណ្ឌូ នៅរដ្ឋ Bihar ភាគខាងកើតប្រទេសឥណ្ឌា។ នេះបើយោងតាមសេចក្ដីរាយការណ៍របស់ប្រព័ន្ធផ្សព្វផ្សាយក្នុងស្រុក។

ឧបទ្ទវហេតុនេះបានកើតឡើងនៅក្នុងតំបន់ Jehanabad ជាកន្លែងដែលអ្នកគោរពបូជាដ៏ស្មោះស្ម័គ្រ បានប្រមូលផ្តុំគ្នា ដើម្បីធ្វើការអធិដ្ឋានប្រចាំសប្តាហ៍ ដែលជាការប្រារព្ធខែប្រកបដោយនក្ខត្តឫក្ស Shrawan ដើម្បីឧទ្ទិសដល់អាទិទេពសាសនាហិណ្ឌូ គឺព្រះសិវៈ។

អ្នករួចជីវិតម្នាក់ បាននិយាយថា ភាពវឹកវរ និងការគ្រប់គ្រងមិនត្រឹមត្រូវ បាននាំឲ្យមានការប្រជ្រៀតជាន់គ្នានេះ។ អាជ្ញាធរកំពុងធ្វើការកំណត់អត្តសញ្ញាណអ្នកស្លាប់ និងរបួស ក្នុងឧបទ្ទវហេតុនេះ។

សូមរំលឹកថា ហេតុការណ៍ប្រជ្រៀតជាន់គ្នាស្រដៀងគ្នានេះ នៅឯព្រឹត្តិការណ៍អ្នកកាន់សាសនាហិណ្ឌូ ក្នុងរដ្ឋជិតខាង Uttar Pradesh បានសម្លាប់មនុស្សជាង ១០០នាក់ កាលពីខែមុន៕