កងកម្លាំងអ៊ីស្រាអែល បានបន្តប្រតិបត្តិការរបស់ខ្លួននៅជិតទីក្រុង ខាន់យូនីស (Khan Younis) ភាគខាងត្បូងនៃតំបន់ហ្កាហ្សា កាលពីថ្ងៃចន្ទ (១២ សីហា) ស្របពេលមានការជំរុញជាអន្តរជាតិសម្រាប់កិច្ចព្រមព្រៀងបញ្ឈប់ការប្រយុទ្ធគ្នានៅតំបន់ហ៊ុមព័ទ្ធនេះ និងទប់ស្កាត់ការធ្លាក់ចូលទៅក្នុងជម្លោះក្នុងតំបន់កាន់តែទូលំទូលាយជាមួយប្រទេសអ៊ីរ៉ង់ និងក្រុមប្រយុទ្ធតំណាងរបស់ខ្លួន។

ក្រុមគ្រូពេទ្យប៉ាឡេស្ទីនបាននិយាយថា ការវាយប្រហាររបស់យោធាអ៊ីស្រាអែលទៅលើក្រុង Khan Younis កាលពីថ្ងៃចន្ទ បានធ្វើឱ្យមនុស្សស្លាប់ និងរបួសរាប់សិបនាក់។ ទន្ទឹមនឹងនោះ ក្រុមគ្រួសារ និងជនភៀសខ្លួនកាន់តែច្រើនបានហូរចេញពីតំបន់ដែលត្រូវបានគំរាមកំហែងដោយបញ្ជាជម្លៀសថ្មីដែលប្រាប់ប្រជាជនឱ្យរត់គេចចេញពីតំបន់នោះ។

នៅពេលដែលការប្រយុទ្ធគ្នានៅតែបន្ត ក្រុមហាម៉ាស បានរារែកចំពោះជុំចុងក្រោយនៃកិច្ចចរចាបទឈប់បាញ់រវាងអេហ្ស៊ីប និងកាតា ដែលគ្រោងនឹងធ្វើឡើងនៅថ្ងៃព្រហស្បតិ៍ (១៥ សីហា) ខាងមុខនេះ ដោយនិយាយថា ខ្លួនមិនបានមើលឃើញសញ្ញាចង់បានសន្តិភាពពីភាគីអ៊ីស្រាអែលទេ។

ចាប់តាំងពីការវាយប្រហារឆ្លងព្រំដែនកាលពីថ្ងៃ៧ តុលា របស់ពួកហាម៉ាសមក កងកម្លាំងអ៊ីស្រាអែលបានសម្រុកវាយលុកតំបន់ហ្កាហ្សា ដោយបានធ្វើឱ្យប្រជាជនភាគច្រើនត្រូវបង្ខំភៀសខ្លួន និងបានសម្លាប់មនុស្សប្រហែល ៤០.០០០នាក់នេះបើយោងតាមក្រសួងសុខាភិបាលប៉ាឡេស្ទីន នៅក្នុងសង្គ្រាមដែលបង្កឱ្យមានភាពភ័យរន្ធត់នៅជុំវិញពិភពលោក។

មន្ត្រីសុខាភិបាលនៅតំបន់ហ្កាហ្សានិយាយថា អ្នកស្លាប់ភាគច្រើននៃជម្លោះគឺជាជនស៊ីវិល ប៉ុន្តែអ៊ីស្រាអែលនិយាយថាយ៉ាងហោចណាស់មួយភាគបីគឺជាអ្នកប្រយុទ្ធ ដោយបន្ថែមថាខ្លួនបានបាត់បង់ទាហាន ៣៣០នាក់នៅក្នុងជម្លោះដ៏បង្ហូរឈាមមួយនេះ៕