រដ្ឋមន្ត្រីមហាផ្ទៃរបស់ប្រទេសស៊ូដង់ លោក ខាលីល ផាសា សេរីន (Khalil Pasha Sairin) បាននិយាយកាលពីថ្ងៃចន្ទសប្ដាហ៍នេះថា មនុស្សសរុបចំនួន ៦៨នាក់បានស្លាប់ ដោយសារភ្លៀង និងទឹកជំនន់ ដែលបានវាយប្រហារផ្នែកជាច្រើននៃប្រទេសស៊ូដង់ ចាប់តាំងពីខែមិថុនាមក។

រដ្ឋមន្ត្រីរូបនេះបាននិយាយនៅក្នុងសេចក្តីថ្លែងការណ៍មួយថា ចំនួនអ្នកស្លាប់ដោយសារទឹកជំនន់ និងភ្លៀងបានកើនឡើងដល់៦៩ នាក់សម្រាប់ហេតុផលផ្សេងៗ រួមទាំងការដួលរលំផ្ទះ និងការលង់ទឹក ខណៈមនុស្ស ១៣០នាក់បានរងរបួស។

លោកបាននិយាយថា លំនៅឋានជាង៤.០០០ខ្នង ត្រូវបានដួលរលំទាំងស្រុង ហើយផ្ទះចំនួន ៨.០០០ខ្នង បានដួលរលំដោយផ្នែក និងសម្ភារៈសាធារណៈ និងឯកជនចំនួន៤០ ត្រូវបានខូចខាត ដោយលោកបានបន្ថែមថា ដីកសិកម្ម ប្រមាណ ៨៣២ គីឡូម៉ែត្រក្រឡា ត្រូវបានរងការបំផ្លិចបំផ្លាញ ទន្ទឹមនឹងសត្វមួយចំនួនបានងាប់។

ទឹកជំនន់ដែលកើតឡើងជារៀងរាល់ឆ្នាំនៅក្នុងប្រទេសស៊ូដង់ ជាធម្មតាកើតឡើងនៅចន្លោះខែមិថុនាដល់ខែតុលា។

ក្នុងរយៈពេលបីឆ្នាំមកនេះ ភ្លៀងធ្លាក់ខ្លាំងបានឆក់យកជីវិតមនុស្សរាប់រយនាក់ និងបំផ្លាញផ្ទៃដីកសិកម្មយ៉ាងច្រើនសន្ធឹកសន្ធាប់ ស្របពេលប្រទេសស្ថិតនៅទ្វីបអាហ្វ្រិកមួយនេះ ធ្លាក់ក្នុងសង្រ្គាម ចាប់តាំងពីថ្ងៃទី១៥ខែមេសា ឆ្នាំ២០២៣ មក ដែលបានឆក់យកជីវិតមនុស្សយ៉ាងច្រើន៕