បេសកជនពិសេសរបស់សហរដ្ឋអាមេរិក បាននិយាយកាលពីថ្ងៃចន្ទថា កិច្ចពិភាក្សាដើម្បីបញ្ចប់សង្គ្រាមរយៈពេល ១៦ ខែ នៅប្រទេសស៊ូដង់ រវាងកងទ័ព និងកងកម្លាំងគាំទ្ររហ័សយោធាប៉ារ៉ា (RSF) នឹងដំណើរការទៅមុខក្នុងសប្តាហ៍នេះ ទោះបីជាមានសញ្ញាតិចតួច ពីភាគីនីមួយៗថា ពួកគេស្វែងរក ដំណោះស្រាយដោយសន្តិវិធី។

កងទ័ពស៊ូដង់ បានច្រានចោលការអញ្ជើញ ខណៈកងកម្លាំងគាំទ្ររហ័សយោធាប៉ារ៉ា(RSF) បានបន្តការវាយលុករបស់ខ្លួននៅក្នុងតំបន់មួយចំនួននៃប្រទេស ទោះបីជាមានការស្វាគមន៍គំនិតផ្តួចផ្តើមរបស់សហរដ្ឋអាមេរិក និងប្រទេសអារ៉ាប៊ីសាអ៊ូឌីត ក៏ដោយ។

ការបរាជ័យនៃកិច្ចខិតខំប្រឹងប្រែង ដើម្បីនាំយកសង្រ្គាមឲ្យឈានដល់ទីបញ្ចប់ ប៉ុន្តែជម្លោះកាន់តែរីកធំឡើង ដែលបានបង្កើតវិបត្តិមនុស្សធម៌ធំបំផុតរបស់ពិភពលោក ជំរុញឲ្យមនុស្ស១០ លាននាក់ភៀសខ្លួនចេញពីលំនៅឋានរបស់ពួកគេ និងបង្កើតស្ថានភាពដូចជាគ្រោះទុរ្ភិក្ស នៅទូទាំងប្រទេស។

លោក Tom Perriello បេសកជនពិសេសរបស់សហរដ្ឋអាមេរិក ប្រចាំប្រទេសស៊ូដង់ បាននិយាយនៅក្នុងទីក្រុងហ្សឺណែវ ជាកន្លែងដែលកិច្ចពិភាក្សា គ្រោងនឹងចាប់ផ្តើមនៅថ្ងៃពុធស្អែកនេះ ថា កិច្ចពិភាក្សា គឺជាកិច្ចខិតខំប្រឹងប្រែងចុងក្រោយរបស់អន្តរជាតិ ដើម្បីបញ្ចប់សង្គ្រាម ហើយមានបំណងព្រមព្រៀងលើការបញ្ឈប់អំពើហិង្សា ការទទួលបានជំនួយមនុស្សធម៌ដ៏ទូលំទូលាយ និងយន្តការមួយដើម្បីពិនិត្យ និងធានាបានការអនុវត្ត។

លោក Perriello បាននិយាយកាលពីថ្ងៃចន្ទថា ទោះបីជាកិច្ចចរចាដែលបានសម្របសម្រួល រវាងកងទ័ព និងកងកម្លាំងគាំទ្ររហ័ស(RSF) ពុំអាចទៅរួចក៏ដោយ ក៏កិច្ចពិភាក្សានឹងបន្តទៅមុខជាមួយអ្នកជំនាញបច្ចេកទេស និងអ្នកសង្កេតការណ៍ រួមទាំងសហភាពអាហ្រ្វិក អារ៉ាប់រួម និងប្រទេសអេហ្ស៊ីប ស្តីពីការបង្កើតផែនការសកម្មភាព ដើម្បីបង្ហាញដល់ ភាគីទាំងអស់។