អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស (Antonio Guterres) កាលពីថ្ងៃចន្ទនេះ បានថ្កោលទោសការបន្តបាត់បង់ជីវិត នៅក្នុងតំបន់ហ្កាហ្សា បន្ទាប់ពីការវាយប្រហារដ៏បំផ្លិចបំផ្លាញរបស់អ៊ីស្រាអែល ទៅលើសាលារៀន Al-Taba'een ក្នុងទីក្រុងហ្កាហ្សា កាលពីថ្ងៃសៅរ៍ ដែលបានសម្លាប់ជនជាតិប៉ាឡេស្ទីនជាង ១០០នាក់។

លោក Farhan Haq អ្នកនាំពាក្យរងរបស់អគ្គលេខាធិការUN បាននិយាយថា៖«លោក អគ្គលេខាធិការថ្កោលទោសការបន្តបាត់បង់ជីវិត នៅតំបន់ហ្កាហ្សា រួមទាំងស្ត្រី និងកុមារ ដូចដែលយើងបានឃើញនូវការវាយប្រហារដ៏បំផ្លិចបំផ្លាញមួយទៀតរបស់អ៊ីស្រាអែល ទៅលើសាលារៀន Al-Taba'een ក្នុងទីក្រុងហ្កា ហ្សា ដែលផ្តល់ជម្រកដល់គ្រួសារប៉ាឡេស្ទីនរាប់រយនាក់ដែលផ្លាស់ទីលំនៅ ដោយមានអ្នកស្លាប់រាប់សិបនាក់ ចំពេលមានការបន្តភ័យរន្ធត់ ការផ្លាស់ទីលំនៅ និងការរងទុក្ខវេទនា នៅក្នុងតំបន់ហ្កាហ្សា។

លោក Haq បាននិយាយថា លោក ហ្គុយតឺរេស មានការស្រងាកចិត្តនៅពេលឃើញថា លក្ខខណ្ឌនៃសេចក្តិសម្រេចលេខ ២៧៣៥របស់ក្រុមប្រឹក្សាសន្តិសុខអង្គការUN នៅតែមិនអាចអនុវត្តបាន។

លោក Haq បានកត់សម្គាល់ថា ប្រមុខអង្គការសហប្រជាជាតិ បានស្វាគមន៍កិច្ចខិតខំប្រឹងប្រែងសម្របសម្រួលរបស់សហរដ្ឋអាមេរិក អេហ្ស៊ីប និងកាតា ហើយបានជំរុញឲ្យភាគីទាំងពីរ ចូលរួមការចរចាឡើងវិញ និងបញ្ចប់កិច្ចព្រមព្រៀងឈប់បាញ់ និងដោះលែងចំណាប់ថ្នូរ។