អ្នកនាំពាក្យរបស់កងពលតូចប្រដាប់អាវុធ al-Qassam គឺលោក Abu Ubaida កាលពីថ្ងៃចន្ទ (ទី១២ ខែសីហា) នេះ បាននិយាយថា ចំណាប់ខ្មាំងជនជាតិអ៊ីស្រាអែលម្នាក់ត្រូវបានសម្លាប់ដោយឆ្មាំរបស់លោក ហើយស្ត្រីជាប់ឃុំខ្លួន ២នាក់ បានរងរបួសយ៉ាងធ្ងន់ធ្ងរ នៅក្នុងឧបទ្ទវហេតុ ២ដាច់ដោយឡែកពីគ្នា នៅតំបន់ហ្កាហ្សា។

លោក Abu Ubaida បានចាត់ទុកឧបទ្ទវហេតុនេះពាក់ព័ន្ធនឹងអ្វីដែលលោកបានពិពណ៌នាថា ជា «ការសម្លាប់រង្គាល» របស់អ៊ីស្រាអែលប្រឆាំងនឹងប៉ាឡេស្ទីន។

នៅក្នុងសេចក្តីថ្លែងការណ៍មួយដែលត្រូវបានបង្ហោះនៅលើកម្មវិធីផ្ញើសារ Telegram លោក Abu Ubaida បានឲ្យដឹងថា៖ «រដ្ឋាភិបាលសត្រូវ (អ៊ីស្រាអែល) ត្រូវទទួលខុសត្រូវទាំងស្រុង ចំពោះការសម្លាប់រង្គាលទាំងនេះ និងនាំឲ្យការឆ្លើយតបដែលប៉ះពាល់ដល់អាយុជីវិតរបស់អ្នកទោសហ្សូនីស»។

លោកបាននិយាយថា គណៈកម្មាធិការមួយត្រូវបានបង្កើតឡើង ដើម្បីស៊ើបអង្កេតព័ត៌មានលម្អិត ហើយការរកឃើញនឹងត្រូវប្រកាសនៅពេលក្រោយ ដោយលោកបន្ថែមថា កិច្ចខិតខំប្រឹងប្រែងកំពុងដំណើរការទៅ ដើម្បីជួយសង្គ្រោះចំណាប់ថ្នូរដែលរងរបួសទាំង ២នាក់ផ្សេងទៀត។

គួរបញ្ជាក់ថា នេះជាលើកទី១ ហើយដែលអង្គភាព Al-Qassam បាននិយាយថា ឆ្មាំរបស់ខ្លួនបានសម្លាប់ចំណាប់ថ្នូរ។ ជារឿយៗ ក្រុមនេះ បានសន្មតថា ការស្លាប់របស់ចំណាប់ថ្នូរកាលពីមុន គឺដោយសារការទម្លាក់គ្រាប់បែករបស់អ៊ីស្រាអែលនៅក្នុងដែនដីនេះ៕