ក្រសួងការបរទេសសហភាពអ៊ីរ៉ង់ បាននិយាយនៅថ្ងៃអង្គារនេះថា ការអំពាវនាវពីប្រទេសបារាំង អាល្លឺម៉ង់ និងអង់គ្លេស ថា អ៊ីរ៉ង់ គួរតែអត់ធ្មត់ចំពោះអ៊ីស្រាអែល ដែល«ខ្វះហេតផលខាងនយោបាយ និងគោលការណ៍ដែលផ្ទុយ ពីច្បាប់អន្តរជាតិ»។

ប្រទេសអ៊ឺរ៉ុបចំនួនបីនេះ បានចេញសេចក្តីថ្លែងការណ៍មួយកាលពីថ្ងៃចន្ទ អំពាវនាវឱ្យអ៊ីរ៉ង់និងសម្ព័ន្ធមិត្តរបស់ខ្លួន បញ្ចៀសការវាយប្រហារលើអ៊ីស្រាអែល បន្ទាប់ពីការសម្លាប់លោក Ismail Haniyeh ប្រធាននយោបាយរបស់ក្រុមសកម្មប្រយុទ្ធហាម៉ាសប៉ាឡេស្ទីន នៅក្នុងទីក្រុងតេអេរ៉ង់ កាលពីខែមុន។

ទីក្រុងតេអេរ៉ង់ និងសម្ព័ន្ធមិត្តរបស់ខ្លួន មានក្រុមហាម៉ាស និងក្រុមហេសបូឡានីកាយស៊ីអ៊ីត នៅលីបង់ បានចោទប្រកាន់អ៊ីស្រាអែលថា បានអនុវត្តឃាតកម្មនេះ។ រដ្ឋាភិបាលអ៊ីស្រាអែល ពុំបានអះអាងពីការទទួលខុសត្រូវនេះទេ។

អ្នកនាំពាក្យក្រសួងការបរទេសអ៊ីរ៉ង់ លោក Nasser Kanaani បាននិយាយថា ទីក្រុងតេអេរ៉ង់ បានប្តេជ្ញា រារាំងអ៊ីស្រាអែល ហើយបានអំពាវនាវឱ្យទីក្រុងប៉ារីស ទីក្រុងប៊ែរឡាំង និងទីក្រុងឡុងដ៍ ក្រោកឈរឡើងស្រុះគ្នាប្រឆាំងសង្រ្គាមនៅហ្កាហ្សា និងប្រឆាំងចរិកឈ្មួញសង្គ្រាមរបស់អ៊ីស្រាអែល។

លោក និយាយថា ភាពអសកម្មរបស់ក្រុមប្រឹក្សាសន្តិសុខអង្គការសហប្រជាជាតិ និងការគាំទ្រផ្នែកនយោបាយ និងយោធាដ៏ទូលំទូលាយរបស់រដ្ឋាភិបាលប្រទេសលោកខាងលិច ចំពោះរបបអ៊ីស្រាអែល គឺជាកត្តាចម្បងនៅពីក្រោយការពង្រីកវិបត្តិនៅតំបន់ហ្កាហ្សា។